اسلام آباد(مانیٹرنگ ڈیسک) سندھ میں رینجرز کے قیام اور خصوصی اختیارات کا مسئلہ حل ہو گیا ، وفاقی وزارت داخلہ نے صوبائی حکومت کی درخواست پر صوبے میں رینجرز کے قیام میں ایک سال جبکہ رینجرز کے خصوصی اختیارات میں 90روز کی توسیع کر دی ہے اس سلسلے میں باضابطہ طور پر دو نوٹیفیکیشن جاری کر دیے ہیں ، رینجرز کراچی ڈویژن میں انسداد دہشت گردی ایکٹ کے تحت کاروائیاں کر سکے گی جبکہ صوبے کی پولیس کی معاونت بھی کرے گی وزارت داخلہ نے رینجرز اختیارات سے متعلق صوبائی حکومت کی پندرہ شرائط مسترد کردیں۔ بدھ کو وفاقی وزارت داخلہ کی طرف سے جاری بیان کے مطابق سندھ میں رینجرز کے قیام میں ایک سال کی توسیع جبکہ رینجرز کے خصوصی اختیارات میں 90روز کی توسیع کا نوٹیفکیشن جاری کیا گیا ہے ، یہ دونوں نوٹیفکیشن صوبائی حکومت کی درخواست پر جاری کئے گئے ہیں ۔ ، دونوں نوٹیفکیشن طویل قانونی مشاورت کے بعد جاری کئے گئے ہیں اب رینجرز دہشت گردوں ، ٹارگٹ کلرز اور جرائم پیشہ عناصر کے خلاف کاروائیاں جاری رکھ سکیں گے ۔ ذرائع کے مطابق رینجرز کو انسداد دہشت گردی ایکٹ کے تحت خصوصی اختیارات کراچی ڈویژن میں کاروائیاں کرنے کے لئے دیئے گئے ہیں ۔ رینجرز کسی بھی کاروائی کے لئے پولیس کو آگاہ کرے گی نہ اجازت لے گی ۔رینجرز کے خصوصی اختیار ات 20جولائی سے90روز کیلئے بحال کیے گئے ہیں جبکہ رینجرز 19جولائی 2017تک سندھ میں موجود رہے گی ۔وزارت داخلہ نے رینجرز اختیارات سے متعلق صوبائی حکومت کی پندرہ شرائط مسترد کردی ہیں۔