اسلام آباد (این این آئی)سول جج ڈیوٹی مجسٹریٹ سلمان بدر نے میڈیا کے نمائندے بن کر 160امریکی انتخابات کی کوریج کے لیے جانے کی کوشش کرنے والے ملزمان کو 4 روزہ جسمانی ریمانڈ پر ایف آئی اے کے حوالے کر دیا۔منگل کو ایف آئی اے نے ملزمان کو عدالت میں پیش کر کے موقف اپنایا کہ چاروں ملزمان میڈیا کی فرضی دستاویزات پر امریکی ویزے کا حصول چاہتے تھے ٗملزمان عدیل انعام،نعیم اختر،محمد شہزاد اور محمد فیصل پیشے کے اعتبار سے ٹیچر، ڈرائیور، نائی اور کسان ہیں جنھوں نے خود کو پروڈیوسر اور کیمرہ مین ظاہر کیا، معاملہ میں ملوث ایجنٹس کی گرفتاری اور مزید تفتیش کیلئے دس دن کا جسمانی ریمانڈ دیا جائے۔ عدالت نے استدعا منظور کرتے ہوئے ملزمان کو چار روزہ جسمانی ریمانڈ پر ایف آئی اے کے حوالے کر دیا اور آئندہ سماعت پر مکمل تفتیشی رپورٹ جمع کرانے کی ہدایت کی۔