اسلام آباد (مانیٹرنگ ڈیسک) الیکشن کمیشن نے ملک بھر میں انتخابی فہرستوں کے سالانہ نظرثانی کی منظوری دے دی ہے جبکہ گھر گھر تصدیق کی تاریخوں میں ردوبدل کرتے ہوئے یکم اگست کی بجائے مہم کے آغاز کا فیصلہ کیا ہے ۔ نئے کمپیوٹرائزڈ قومی شناختی کارڈ کے حامل ووٹروں کے اندراج کیلئے مہم کے تحت 10سے 29اگست تک الیکشن کمیشن کا عملہ گھر گھر جاکر تصدیقی عمل کو منطقی انجام تک پہنچائے گا۔ کمیشن کی جانب سے جاری تفصیلات کے مطابق گھر گھر تصدیقی مہم 10 سے 29 اگست تک 20 دنوں کیلئے ہو گی جس کے بعد 20 ستمبر سے 21دنوں کے لئے یہ ووٹر فہرستیں مختلف ڈسپلے مراکز پر آویزاں کی جائیں گی، نئے شناختی کارڈ کے حامل افراد کی تصدیق کیلئے الیکشن کمیشن کا تفویض شدہ عملہ گھر گھر جاکر تصدیق کرے گا، اس کے ساتھ ساتھ وفات پا جانے والے یا پاکستان کی شہریت ترک کرنے والے ووٹروں کے نام ووٹر فہرستوں سے نکالنے کیلئے بھی گھر گھر جاکر تصدیق کی جائے گی جس کے بعد ڈسٹرکٹ الیکشن کمشنرز، رجسٹریشن آفیسرز اور اسسٹنٹ رجسٹریشن آفیسرز کے دفاتر کے باہر یہ فہرستیں آویزاں کی جائیں گی، ان ڈسپلے مراکز کی فہرست کمیشن کی ویب سائٹ پر دستیاب ہوگی۔ اس کے ساتھ ساتھ عوام میں آگاہی کیلئے وسیع پیمانے پر میڈیا مہم بھی چلائی جائیگی۔ ووٹرز سے استدعا کی جائے گی کہ وہ موبائل کے ذریعے 8300 پر ایس ایم ایس کے ذریعے اپنے ووٹ چیک کریں۔ اگر کسی درخواست گزار نے اپنے ووٹ کا اندراج، منتقلی، درستگی یا اخراج کرانا ہے تو وہ طے شدہ فارم کے اوپر الیکشن کمیشن کے متعلقہ حکام کو درخواست دے گا۔ الیکشن کمیشن نے اس ضمن میں صوبائی، ریجنل اور ڈسٹرکٹ الیکشن کمشنر کو ضروری ہدایات جاری کردی ہیں۔ توقع ہے کہ اس عمل کے بعد ووٹروں کی تعداد 9 کروڑ 30 لاکھ سے بڑھ کر 9 کروڑ 70 لاکھ سے تجاوز کر جائے گی اس مہم کے دوران موثر مانٹیرنگ بھی کی جائے گی۔