کراچی (مانیٹرنگ ڈیسک ) وزیر اعلی سندھ قائم علی شاہ کی دبئی میں الوداعی ملاقاتیں ، ملاقاتوں کے دوران انکی خدمات کو سراہا گیا ، وزیر اعلی سندھ آج دوپہر ایک بجے کراچی پہنچیں گے ، وزیر آعلیٰ آئندہ 48 گھنٹوں میں استعفیٰ دیں گے ۔ذرائع کے مطابق وزیر اعلیٰ سندھ سید قائم علی شاہ خود جا کر گورنر ہاوس میں استعفی گورنر سندھ کو پیش کریں گے ۔ گورنر سندھ کی منظوری کے بعد گورنر سندھ اسمبلی کے خصوصی اجلاس طلب کریں گے ۔ اجلاس میں وزیراعلیٰ سندھ کا انتخاب اور رینجرز کے اختیارت کی منظوری دی جائیں گی ۔
واضح رہے کہ پیپلز پارٹی نے دبئی اجلاس میں وزیر اعلیٰ سندھ سمیت کابینہ میں اہم تبدیلیوں کا فیصلہ کیا ہے ۔ سندھ کے نئے وزیر اعلیٰ مراد علی شاہ ہوں گے۔ سندھ اسمبلی کے سپیکر آغا سراج درانی کو صوبائی وزیر جبکہ سکندر میندهرو کو سپیکر بنانے کا فیصلہ بھی کیا گیا ہے۔ ذرائع کا کہنا ہے بلاول بھٹو اپنے قریبی رہنماؤں میں سے تین سے چار کو صوبائی حکومت میں مشیر لگوائیں گے۔ نثار کھوڑو کو سینئر وزیر برائے داخلہ یا خزانہ مقرر کیے جانے کا امکان ہے۔ نادر مگسی، منظور وسان، ناصر شاہ اور ضیا لنجار بھی کابینہ میں شامل ہوں گے۔ وزیر داخلہ سہیل انور سیال اور وزیر بلدیات جام خان شورو کو عہدے سے ہٹانے کا فیصلہ بھی کیا گیا ہے۔ ذرائع کے مطابق سردار شاہ، فیاض بٹ، پیر مجیب، اصغر جونیجو بھی متوقع طور پر سندھ کے نئے وزراء میں شامل ہوں گے۔ ڈپٹی سپیکر شہلا رضا کو ان کے عہدے سے ہٹا کر وزیر تعلیم مقرر کیے جانے کا امکان ہے۔ کابینہ میں 3 خواتین ارکان کو بھی شامل کیا جائے گا۔ محمد علی ملکانی کو دوبارہ وزارت ملنے کا امکان ہے جبکہ مولا بخش چانڈیو کے بھی دوبارہ مشیر اطلاعات مقرر ہونے کی اطلاعات ہیں ۔