اسلام آباد(مانیٹرنگ ڈیسک) نجی ٹی وی پروگرا م میں سینئر تجزیہ نگار نے اہم انکشافات کر دیئے۔ نجی ٹی وی پروگرام میں گفتگو کرتے ہوئے سینئر تجزیہ نگار نے کہا کہ وزیر اعلیٰ سندھ کو اچانک تبدیل کرنے کی اہم ترین وجہ رینجرز اختیارات ہیں۔ پیپلز پارٹی کی قیادت کو قائم علی شاہ سے شکایت تھی کہ وہ صحیح انداز میں عسکری قیادت سے بات چیت نہیں کر پاتے۔ سینئر تجزیہ نگار ڈاکٹر شاہد مسعود نے کہا کہ اپیکس کمیٹی میں ایک مرحلہ ایسے بھی آیا تھا جب قائم علی شاہ کی گورننس کی بات ہو رہی تھی تو قائم علی شاہ نے عسکری قیادت کو کہا تھا کہ اگر آپ کو میری گورننس پر اعتراض ہے تو میں استعفیٰ دے دوں گا۔ قائم علی شاہ نے بہت کمزور بیان دے دیا تھا جس پرآصف علی زرداری جو کہ وہاں موجود تھے انہوں نے معاملے کو سنبھالا تھا۔
سینئر تجزیہ نگار ڈاکٹر شاہد مسعود نے کہا کہ بہت سے لوگوں کو اعتراضات تھے کہ جب اندرون سندھ آپریشن کی بات ہوتی ہے تو رینجرز، کورکمانڈرز اور دیگر عسکری حکام سے وہ مناسب انداز میں بات ہی نہیں کر سکتے۔ قائم علی شاہ کی اچانک تبدیلی میں اہم ترین بات رینجرز اختیارات معاملہ ہے۔ پہلے یہ بات چلی تھی کہ صوبائی وزیر داخلہ استعفیٰ دے دیں لیکن پھر قائم علی شاہ کو ہٹانے کا فیصلہ کیا گیا۔