اسلام آباد(مانیٹرنگ ڈیسک) انسداد دہشت گردی کی عدالت کے دروازے بند کرکے ایم کیو ایم کے اہم رہنماؤں کو گرفتار کر لیا گیا‘ نجی ٹی وی رپورٹ کے مطابق ایم کیو ایم کے کچھ لوگ عدالت کے اندر موجود ہیں ، گرفتار رہنماؤں کے وکیلوں کی جانب سے عدالت کو درخواست کی گئی ہے کہ فیصلہ ایک روز کیلئے موخر کیا جائے۔
نجی ٹی وی رپورٹ کے مطابق انسداد دہشتگردی کی عدالت میں ڈاکٹر عاصم حسین کرپشن کیس کی سماعت ہوئی ، اس موقع پر پولیس نے ضمانت خارج ہونے پرپاک سرزمین کے انیس قائم خانی ،ایم کیو ایم کے وسیم اختر اور رؤف صدیقی کو حراست میں لے لیا ، وسیم اختر نے ضمانت منسوخ ہونے پر عدالت سے باہر جانے کی کوشش کی تو پولیس اہلکاروں نے انہیں روک لیا جس پر ان کی پولیس اہلکاروں سے تلخ کلامی بھی ہوئی جبکہ پیپلز پارٹی کے رہنما عبدالقادر پٹیل ضمانت منسوخ ہونے پر احاطہ عدالت سے فرار ہوگئے۔
احاطہ عدالت کو چاروں طرف سے سیکورٹی اہلکاروں نے گھیرے میں لے لیا ہے۔ ذرائع کے مطابق اہم رہنماؤں کو باقاعدہ گرفتاری کے بعد کچھ ہی دیر میں جیل منتقل کردیا جائے گا۔ ذرائع کے مطابق ایم کیو ایم کے رہنماؤں کی گرفتاریوں سے کراچی میں ہلچل مچ گئی ہے۔