اسلام آباد(مانیٹرنگ ڈیسک) نجی ٹی وی پروگرام میں سینئر تجزیہ نگار نے دھماکہ خیز دعویٰ کر دیا۔ نجی ٹی وی پروگرام میں گفتگو کرتے ہوئے سینئر تجزیہ نگار نے کہا کہ پاکستان کے حالات ترکی سے یکسر مختلف ہیں۔ ترکی کو اندرونی اور بیرونی خلفشار کا سامنا اس طرح نہیں جس طرح پاکستان کو ہے، ترکی میں فرقہ وارانہ، لسانی اور صوبائی تعصب بھی پاکستان کی طرح نہیں اور نہ ہی ترکی کو بھارت جیسے عیار اور مکار دشمن کا سامنا ہے اسلئے ترکی میں مارشل لاء لگانے کی کوشش کی گئی تو وہاں کی عوام ٹینکوں کے آگے لیٹ گئے۔ لیکن پاکستان میں حالات ایسے نہیں۔
سینئر تجزیہ نگار حامد میر نے کہا کہ پاکستان کے ہمسایہ ممالک پاکستان میں بہت زیادہ دخل اندازی کر رہے ہیں۔ خدانخواستہ پاکستان میں مارشل لاء جیسی صورتحال پیدا ہوگئی تو ہو سکتا ہے کہ کچھ لوگ لاہور اور کراچی میں مزاحمت کرتے ہوئے نظر آئیں لیکن بتدریج پاکستان کے دشمن یہ کوشش کریں گے کہ پاکستان کے لوگ فوج کیخلاف پر امن سیاسی جدوجہد نہ کریں بلکہ ان کو دہشت گردی کی طرف اکسایا جائے گا۔ خاص طور پر بلوچستان اور دیگر ٹرائبل ایریاز میں افغانستان کے راستے مداخلت ہوگی ، فوج اور عوام کو آمنے سامنے لایا جائے گا۔ سینئر تجزیہ نگار حامد میر نے کہا کہ ہمیں یہ دعا کرنی چاہئے کہ پاکستان میں ایسے حالات پیدا نہ ہوں ۔ پاکستان میں لوگ اس طرح پر امن انداز میں نہیں ہوں گے ، یہاں ناجائز اسلحے کی بھرمار ہے اور لوگ وہ اسلحہ استعمال کریں گے۔ دشمن تو چاہتا ہے کہ حالات اس طرح کے پیدا ہوں اور وہ شدت پسندوں کو فوج کیخلاف استعمال کرے اور عوام و فوج کو ایک دوسرے کے سامنے لا کھڑا کرے۔

موضوعات:پر امن سیاسی جدوجہد دہشتگردی سینئر تجزیہ نگار