لاہور( این این آئی) ماڈل قندیل بلوچ کے قتل کی ایف آئی آر کو ناقابل معافی ایف آئی آر میں تبدیل کردیا گیا جس کے بعد مقتولہ ماڈل کے والدین اسکے قاتل بھائی کو معاف نہیں کرسکیں گے۔ایک رپورٹ کے مطابق کیس کی تفتیش کرنے والے سینئر پولیس آفیسر نے نام ظاہر نہ کرنے کی شرط پر بتایا کہ قتل کے مقدمے میں پاکستان پینل کوڈ کی دفعات 305 اور 311 بھی شامل کردی گئی ہیں۔ایڈووکیٹ بلک شیر کھوسہ نے نجی ٹی وی سے بات کرتے ہوئے کہا کہ ان دفعات کا مقدمے میں شامل کیا جانا خوش آئند ہے جس کے بعد ورثا ء اور قاتل کے درمیان کوئی معاہدہ نہیں ہوسکتا۔اب ریاست ہی شکایت کنندہ بن چکی ہے اور اب قتل کا مقدمہ ریاست کی طرف سے چلایا جائے گا۔واضح رہے کہ قندیل بلوچ کو ہفتہ کے روز ملتان کے علاقے کریم آباد میں انکے بھائی نے غیرت کے نام پر قتل کردیا تھا۔ان کے والد نے دعوی کیا تھا کہ قندیل کو ان کے بیٹے وسیم نے غیرت کے نام پر قتل کیا۔