لاہور(آئی این پی) چےئر مین واپڈا ظفر محمودنے کہا ہے کہ کالا باغ ڈیم صرف پانی ہی ذخیرہ کرنے والا ڈیم نہیں یہ پاکستان کی لائف لائن ثابت ہو سکتا ہے ‘کالا باغ ڈیم کے متعلق لوگوں کے ذہنوں میں بہت سے ابہام ہیں‘ لوگ معصوم ذہن کے ہوتے ہیں ان کو بعض لوگوں نے اس ڈیم کے خلاف بنایا ہے جبکہ حقیقت میں یہ ڈیم پاکستان کی خوشحالی کا باعث بنے گا ‘ کالا باغ ڈیم جیسا ڈیم چین میں 22 ہزار میگا واٹ بجلی پیدا کر رہا ہے ‘ ہمارے اس ڈیم سے 3 ہزار میگا واٹ سے زائد بجلی پیدا کر سکتے ہیں ‘ وفاقی حکومت اس پراجیکٹ کو فنڈز دینے کے لیے تیار ہے مگر دوسرے صوبوں کو بھی ساتھ دینا ہوگا ‘ لوگوں کے ذہنوں سے تحفظات دور کرنے ہوں گے ۔ اپنے ایک انٹر ویو کے دوران چےئر مین واپڈہ ظفر محمود نے کہا کہ ڈیم کبھی نقصان نہیں کرتا اس کا مقصد صرف پانی کو ذخیرہ کرنا ہوتا ہے بجلی بنانا ہوتا ہے ۔ کبھی پانی کی کمی کا سامنا ہو جائے تو اس پانی کو استعمال کیا جا سکتا ہے ۔انہوں نے کہا کہ کالاباغ ڈیم کے مخالفین کو قومی مفاد اور عوام کی جان و مال کو سامنے رکھتے ہوئے از سر نو ڈیم کی تعمیر کرنی ہوگی لوگوں کو بتانا ہوگا یہ ڈیم ان کے فائدے کیلئے ہے ملکی سلامتی کے لئے ناگزیر ہے ۔ جن لوگوں نے اس ڈیم کو متنازعہ بنایا انہیں اپنی تصحیح کرنی چاہیے ۔ انہوں نے کہا کہ ہمارے پاس آج تک واٹر ریکارڈ ہی نہیں یہ بد قسمتی ہے ملک میں ہر سال لاکھوں کیوسک پانی سمندر میں بہہ جاتا ہے جو المیہ ہے ۔ وفاقی حکومت اس پراجیکٹ کو فنڈز دینے کے لیے تیار ہے مگر دوسرے صوبوں کو بھی ساتھ دینا ہوگا ‘ لوگوں کے ذہنوں سے تحفظات دور کرنے ہوں گے