فیصل آباد(مانیٹرنگ ڈیسک )عدالت کے باہر خواتین نے مل کر چوتھی شادی کے خواہشمند شخص کی دھنائی کردی اور اس دوران وہاں موجود ٹریفک وارڈنز تماشا دیکھتے رہے۔ فیصل آباد کے علاقے ڈجکوٹ کی رہائشی خاتون شمیم نے اپنے سابق شوہر اصغر پر نان نفقے کے لیے مقدمہ درج کررکھا ہے۔ کیس کی سماعت کے لیے عدالت پہنچا تو شمیم اور اس کے بہنوں نے عدالت کے باہر ہی اسے گھیر لیا۔ کچھ دیر زبانی تکرار کے بعد خواتین نے مل کر اصغر کی پٹائی شروع کردی۔ اس موقع پر ٹریفک وارڈنز بھی موجود تھے لیکن وہ معاملہ رفع دفع کرانے کے بجائے ساری صورت حال سے لطف اندوز ہوتے رہے۔ اصغر کی درگت بنتے دیکھ کر چند راہ گیر میدان میں آئے اور انہوں نے اصغر کو خواتین سے چھڑایا۔ جس پر شمیم نے کہا کہ وہ اصغر کی تیسری بیوی ہے لیکن اس نے چوتھی شادی کے لیے اسے طلاق دے دی ہے۔ وہ اپنے بچوں کے ساتھ رہتی ہے لیکن اصغر اپنے بچوں کا خرچ بھی نہیں دیتا۔