اسلام آباد (این این آئی) محکمہ موسمیات نے کہا ہے کہ اسلام آباد سمیت ملک کے مختلف علاقوں میں تیز ہواؤں اور گرج چمک کیساتھ اور چند مقامات پر موسلادھار بارش کا امکان ہے۔ محکمہ موسمیات کے مطابق آئندہ 24 گھنٹوں کے دوران زیریں سندھ (کراچی ،میرپورخاص، حیدرآباد ڈویژن)، شمالی بلوچستان (قلات، نصیر آباد، مکران، ژوب ڈویژن)، خیبرپختونخوا، فاٹا، اسلام آباد، پنجاب، گلگت بلتستان اور کشمیر میں کہیں کہیں تیز ہواؤں اور گرج چمک کیساتھ بارش کا امکان ہے۔ اس دوران چند مقامات پر موسلادھار بارش بھی ہو گی۔آئندہ 48گھنٹوں کے دوران خیبرپختونخوا، فاٹا، اسلام آباد، بالائی پنجاب، گلگت بلتستان اور کشمیر میں اکثر مقامات گرج چمک کیساتھ بارش کا امکان ہے۔ اس دوران چند مقامات پر موسلادھار بارش کا بھی امکان ہے۔ زیریں سندھ (کراچی ، حیدرآباد ڈویژن)، جنوبی پنجاب (ملتان، ڈی جی خان، بہاولپور ڈویژن)، قلات اور ژوب ڈویژن میں بھی چند مقامات پر تیز ہواؤں اور گرج چمک کیساتھ بارش کا امکان ہے۔ گزشتہ24گھنٹوں کے دوران کشمیر، مالاکنڈ، ہزارہ، ڈی آئی خان، قلات، میر پور خاص ڈویژن اور بارکھان میں کہیں کہیں تیز ہواؤں اور گرج چمک کیساتھ بارش ہوئی۔سب سے زیادہ بارش کشمیر میں کوٹلی85، مظفر آباد23، گڑھی دوپٹہ10، خیبرپختونخواہ میں کاکول88، بالاکوٹ61 سید شریف45، لوئر دیر43، مالم جبہ17، بلوچستان میں خضدار03، بارکھان02 جبکہ سندھ میں چھاچرو کے مقام پر 22ملی میٹر بارش ریکارڈ کی گئی۔ بدھ کو ملک میں زیادہ سے زیادہ درجہ حرارت پنجگور 46، دالبندین، سبی، سکھر 45، نوکنڈی،تربت، دادو، لاڑکانہ اور موہنجو داڑو میں 43 ڈگری سینٹی گریڈ ریکارڈ کیا گیا۔