اسلام آباد (این این آئی) پاکستان نے مطالبہ کیا ہے کہ مقبوضہ کشمیر معصوم کشمیریوں کے قتل کے ذمہ داروں کی شفاف تحقیقات ہونی چاہئیں ، انسانی حقوق کی پامالی پر بھارت کو کسی قسم کا استثنیٰ نہیں ملنا چاہیے ۔سیکرٹری خارجہ اعزاز چوہدری نے دفتر خارجہ میں یورپی ممالک کے سفیروں کو مقبوضہ کشمیر میں کشمیریوں پر بھارتی بریریت اور قتل و غارت گری کے حوالے سے بریفنگ دیتے ہوئے بھارتی فورسز کے ہاتھوں نہتے کشمیریوں کی شہادت پر پاکستان کے تحفظات سے آگاہ کیا ۔انہوں نے کہاکہ انسانی حقوق کی پامالی کرنے والے بھارت کو کسی قسم کا استثنیٰ نہیں دینا چاہیے ۔ بے گناہ کشمیریوں کے قتل کے ذمہ داروں کے خلاف شفاف تحقیقات کی ضرورت ہے ۔ یورپی یونین کے ممالک بھارتی مظالم کیخلاف آواز اٹھائیں ۔انسانی حقوق کا وکیل ہونے کے ناطے یورپی ممالک بھارتی مظالم کی مذمت کریں ، بھارت کو انسانی حقوق کی پامالی سے روکنے کیلئے اقدامات اٹھائے جائیں،بھارت انسانی حقوق غصب کر کے کشمیری عوام کو ان کے بنیادی مطالبے سے نہیں ہٹا سکتا ۔