گوجرانوالہ(این این آئی)یونین کونسل نڈالا سندھواں سے کامیاب ہونے والا تحریک انصاف کا واحد جنرل کونسلر اختیارات نہ ملنے پر خودکشی کیلئے کھمبے پر چڑھ گیا۔ اطلاعا ت کے مطابق گوجرانوالہ کی تحصیل فیروز والہ کی یونین کونسل نڈالا سندھواں میں لیاقت علی نامی جنرل کونسلر خود کشی کیلئے موبائل سیلولر ٹاور پر چڑھ گیا۔ اس کا کہنا تھا کہ وہ اپنی یونین کونسل میں تحریک انصاف کا واحد کامیاب امیدوار ہے ٗعوام نے بڑی امیدوں کے ساتھ اسے کامیاب کرایا ہے لیکن اختیارات نہ ملنے کے باعث وہ اپنے علاقے کے عوام کے مسائل حل نہیں کرسکتا، جس پر اسے شرمندگی کا سامنا کرنا پڑتا ہے اس لئے شرمندگی سے بچنے کیلئے وہ خود کشی کو ترجیح دے رہا ہے تاہم لوگوں نے منت سماجت کرکے لیاقت کو خودکشی کی کوشش سے باز رکھا اور اسے نیچے اتارنے میں کامیاب ہوگئے،دوسری جانب پولیس نے خود کشی کی کوشش کرنے والے جنرل کونسلر کی تلاش شروع کردی ہے۔ ایس ایچ او تھانہ فیروز والا کا کہنا ہے کہ جنرل کونسلر کی گرفتاری کے لئے اس کے گھر پر چھاپہ بھی مارا گیا تاہم کوئی گرفتاری عمل میں نہ آسکی اور ملزم اپنا موبائل فون بند کرکے گھرسے غائب ہے۔

موضوعات:تحریک انصاف