اسلام آباد(این این آئی) سیکرٹری خارجہ اعزاز چوہدری نے کہا ہے کہ مقبوضہ کشمیر میں پر امن مظاہرین پر بھارتی تشدد اور فائرنگ ناقابل قبول ہے۔دفتر خارجہ اسلام آباد میں اقوام متحدہ کی سلامتی کونسل کے مستقل رکن ممالک امریکا، چین، برطانیہ ، فرانس اور روس کے سفارت کاروں نے سیکرٹری کارجہ اعزاز چوہدری سے ملاقات کی۔ ملاقات کے دوران سیکرٹری خارجہ نے عالمی طاقتوں کے سفرا کو مقبوضہ کشمیر میں بھارتی فوج کے مظالم اور گزشتہ چند روز کے دوران بے گناہ کشمیریوں کی شہادتوں کے بارے میں آگاہ کیا۔سیکریٹری خارجہ نے کہا کہ بھارت مقبوضہ کشمیر میں انسانی حقوق کی سنگین خلاف ورزیاں کر رہا ہے، بھارتی فورسز مقبوضہ کشمیر میں ماورائے عدالت ہلاکتوں میں ملوث ہے، پاکستان کیلئے پرامن مظاہرین پر تشدد اور فائرنگ ناقابل قبول ہے۔ نجی ٹی وی کے مطابق انہوں نے کہاکہ بھارت پر اقوام متحدہ کی قراردادوں پر عملدرآمد کیلئے دباؤ بڑھایا جائے۔واضح رہے کہ گزشتہ روز کے دوران بھارتی قابض فورسز کی فائرنگ سے 32 کشمیری شہید ٗ درجنوں زخمی ہوچکے ہیں۔