نیویارک : اگر آپ موٹاپے سے بچاﺅ کے لیے کھانا چھوڑنے یا ڈائٹنگ کا انتخاب کرتے ہیں تو جان لیں کہ یہ آپ کی جسمانی صحت کے ساتھ ساتھ دماغ کے لیے بھی تباہ کن ثابت ہوسکتا ہے۔
یہ انتباہ امریکا میں ہونے والی ایک طبی تحقیق میں سامنے آیا ہے۔
یالے اسکول آف میڈیسین کی تحقیق میں بتایا گیا ہے کہ ڈائٹنگ اور بہت زیادہ ورزش کی عادت ذیابیطس اور الزائمر امراض کا شکار بنا سکتی ہے۔
تحقیق میں مزید بتایا گیا ہے کہ ڈائٹنگ یا بہت کم کھانے سے جسمانی دفاعی نظام کا وہ حصہ بلاک ہوجاتا ہے جو ذیابیطس ٹائپ ٹو اور الزائمر امراض کو روکنے کے لیے بہت اہمیت رکھتا ہے۔
تحقیق میں مزید بتایا گیا ہے کہ جسمانی دفاعی نظام کا یہ حصہ درحقیقت جسمانی سوجن یا ورم پر کنٹرول رکھ کر ذیابیطس اور الزائمر کو دور رکھتا ہے تاہم ڈائٹنگ سے اس کے بلاک ہونے سے متعدد امراض کا خطرہ بڑھ جاتا ہے۔
محققین کا کہنا ہے کہ یہ جسمانی نظام این ایل آر پی تھری پروٹینز کے پیچیدہ سیٹ پر مشتمل ہوتا ہے اور موٹاپے سے بچاﺅ کے لیے اپنائی جانے والی ناقص حکمت عملی اس کے لیے تباہ کن ثابت ہوتی ہے۔
