کراچی(این این آئی)شہرت کی بلندیوں پر پہنچنے کے باوجود امجد صابری لیاقت آباد میں ہی رہائش پذیر رہے، مکان بدلنے کے سوال پر کہا کرتے تھے لالوکھیت ان کا گھر ہے، ذرا سی تکلیف پر پورامحلہ مدد کو آجاتا ہے یہ علاقہ کیسے چھوڑ سکتا ہوں۔لیاقت آباد چار نمبر میں واقع مکان نمبر3/906میں غلام فرید صابری نے ہجرت کے بعد پوری عمر گزاری اور ان کے جانشین بیٹامجد صابری نے بھی آخری وقت تک اسی مکان میں سکونت اختیار کیئے رکھی۔امجد صابری کہا کرتے تھے کہ بچے اکثر گھر شفٹ ہونے کا کہتے ہیں، مگر لیاقت آباد والی محبتیں کہیں اور نہیں مل سکتیں، غلام فرید صابری کے ساتھ ان کے بھائی مقبول احمد صابری کا گھر بھی اسی گلی میں موجود ہے، صابری برادران ہی نہیں بلکہ ان کے بچوں نے بھی ان گلیوں کو نہیں چھوڑا۔امجد صابری اپنے علاقے لالوکھیت کی طرح اپنے ملک کو بھی بہت اہمیت دیتے تھے،لیاقت آباد سے محبت کرنے والے قوال نے جان بھی لیاقت آباد میں ہی دی، قاتلوں نے امجد فرید صابری کو ان کے والد کے نام سے موسوم غلام فرید صابری انڈرپاس کے قریب نشانہ بنایا۔