کراچی(این این آئی)محکمہ موسمیات نے امکان ظاہر کیا ہے کہ شوال کا چاند 5 جولائی کو نظر آ سکتا ہے،عید 6جولائی بدھ کے دن ہو گی۔ مرکزی رویت ہلال کمیٹی کا اجلاس اس بار لاہور میں ہوگا جبکہ وزارت مذہبی امور نے ایک بار پھرمفتی پوپلزئی کو رام کرنے کیلئے تیارکرلی ہے۔تفصیلات کے مطابق روزے 29ہونگے یا 30 یہ تو شوال کا چاند نظر آنے پر ہی واضح ہوگا مگر محکمہ موسمیات نے کہا ہے کہ شوال کا چاند 5 جولائی کو نظر آ سکتا ہے یعنی عید 6 جولائی بروز بدھ کومتوقع ہے۔ساتھ ہی محکمہ موسمیات نے یہ بھی کہہ دیا ہے کہ صورتحال 20رمضان کے بعد واضح ہو سکے گی۔ دوسری جانب شوال کا چاند دیکھنے کیلئے مرکزی رویت ہلال کمیٹی کا اجلاس اس بارکراچی کے بجائے لاہور میں ہوگا جس کی صدارت مفتی منیب الرحمن کرینگے۔اجلاس میں شوال کے چاند کی شہادتوں کا جائزہ لیا جائے گا۔ وزارت مذہبی امور نے پشاور کی مسجد قاسم خان کے مفتی شہاب الدین پوپلزئی سے رابطے کی تیاریاں بھی کرلی ہیں۔ وزارت مذہبی امور کی کوشش ہے کہ ملی یکجہتی کیلئے ملک بھر میں روزہ کی طرح ایک ہی دن عید بھی ہو۔