ٹانک: نامعلوم موٹرسائیکل سواروں کی فائرنگ کے نتیجے میں ڈسٹرکٹ بار کے سابق صدر عبدالرحمان جاں بحق جب کہ ان کے ساتھی شدید زخمی ہوگئے۔
ایکسپریس نیوز کے مطابق سابق صدر ڈسٹرکٹ بار عبدالرحمان اپنے ساتھی وکیل یوسف برکی کے ہمراہ گھر سے عدالت جارہے تھے کہ راستے میں نامعلوم موٹرسائیکل سواروں نے ان کی گاڑی پر اندھا دھند فائرنگ کردی جس کے نتیجے میں گولیاں لگنے سے عبدالرحمان ایڈووکیٹ موقع پر ہی جاں بحق ہوگئے جبکہ ان کے ساتھی شدید زخمی ہوگئے۔ واقعے کے فوری بعد امدادی رضاکاروں نے موقع پر پہنچ کر دونوں کو ڈی ایچ کیو اسپتال منتقل کردیا جہاں ڈاکٹروں نے ڈسٹرکٹ بار ٹانک کے سابق صدر کے جاں بحق ہونے کی تصدیق کردی جبکہ ان کے ساتھی یوسف برکی کے سینے پر گولی لگی جن کی حالت تشویشناک بتائی جاتی ہے۔
