سڈنی: ورلڈ کپ سے قبل بنگلا دیش کے خلاف وارم میچ کے دوران فاسٹ بولر سہیل خان انجری کا شکار ہوگئے ہیں۔ 

سڈنی کے بلیک ٹاؤن اولمپک پارک میں بنگلا دیش کے خلاف وارم اپ میچ میں ابھی 15 اوورز کا کھیل ہی ہوا تھا کہ بولنگ کے دوران سہیل خان کے پیر میں تکلیف ہوگئی، جس کے بعد وہ گراؤنڈ سے باہر آگئے۔ جہاں قومی ٹیم کے فزیو تھراپسٹ نے ان کا علاج شروع کردیا۔

ٹیم حکام کا کہنا ہے کہ سہیل خان کی پنڈلی میں سوجن ہے جسے دورکرنے کے لئے اقدامات کئے جارہے ہیں، فاسٹ بالر کی فٹنس کے بارے میں دو روز بعد ہی صورت حال سامنے آئے گی۔

واضح رہے کہ اس سے قبل جنید خان اور محمد حفیظ بھی انجری کا شکار ہوکر میگا ایونٹ سے باہر ہوگئے ہیں۔