نئی دہلی(آئی این پی )بھارت کی بڑی اپوزیشن جماعت کانگریس نے جوہری سپلائر گروپ (این ایس جی)میں پاکستان کے داخلے کی مخالفت نہ کرنے کے وزیر خارجہ سشما سوراج کے بیان کی شدید مذمت کرتے ہوئے کہا ہے کہ کئی ممالک کو چوری چھپے جوہری ٹیکنالوجی فروخت کرنے والے پڑوسی ملک کی حمایت کرنا افسوسناک قدم ہے۔بھارتی میڈیا کے مطابق کانگریس کے سینئر لیڈر جے رام رمیش نے پریس کانفرنس کرتے ہوئے کہا کہ پاکستان، کوریا سمیت مختلف ممالک کو چوری چھپے جوہری ٹیکنالوجی فروخت کرنے کے لئے بدنام رہا ہے اوروزیر خارجہ سشما سوراج کی طرف سے اس کی این ایس جی میں داخلے کی طرف داری کرنا مودی حکومت کے رویہ پر سوالیہ نشان کھڑا کرتا ہے۔انہوں نے مودی حکومت کی خارجہ پالیسی پر سوال کھڑے کرتے ہوئے کہاکہ مودی حکومت کی خارجہ پالیسی سمجھ سے باہر ہے کیونکہ وزیر خارجہ سشما سوراج یہ کہتی ہیں کہ پاکستان کی این ایس جی کی رکنیت کی بھارت مخالفت نہیں کرے گا، جبکہ حقیقت یہ ہے کہ دنیا جانتی ہے کہ ہمارا پڑوسی ملک جوہری ٹیکنالوجی کی غیر قانونی فروخت کا اہم ذریعہ رہا ہے۔