اسلام آباد (این این آئی)پیمراشکایات کونسل اسلام آباد کا38واں اجلاس چیئر پرسن محترمہ شمیم ہمایوں کی زیر صدارت پیمرا ہیڈکوارٹرز، اسلام آباد میں منعقدہوا۔ سینیٹر عبدالرحمن ملک کی جانب سے چینل- 24کیخلاف دائر کردہ شکایت کی سماعت کے دوران چینل- 24 نے سینیٹر عبدالرحمن ملک کی پروگرام ” میرے عزیز ہموطنو ” میں تضحیک کرنے پر معافی مانگ لی ۔ کو نسل نے مذکورہ چینل کو انتباہ جاری کرنے اور پرائم ٹائم کے دوران معافی نشر کرنے کے احکامات دئیے ہیں ۔جبکہ کونسل نے سینیٹر عبدالرحمن ملک کی جیوٹی وی کیخلاف دائر کردہ شکایت کی سماعت جیو ٹی وی کی جانب سے دائر کردہ جواب پر سینیٹر عبدالرحمن کو اپنا مؤقف جمع کرانے کی ہدایت کرتے ہوئے مؤخر کر دی۔ ملالہ یوسفزئی کے والد ضیاالدین یوسفزئی کی جانب سے اے آر وائی اور سچ ٹی وی کیخلاف دائر کردہ شکایت کی سماعت کونسل نے اے آر وائی نیوز کی درخواست پر اگلے اجلاس تک مؤخر کر دی۔ جبکہ وزیرِخزانہ اسحاق ڈار اور محترمہ سائرہ افضل تارڑ، وزیر مملکت برائے صحت کی اے آر وائی نیوز اور دیگر چینلزکیخلاف جھوٹے الزامات نشر کرنیکی شکایات کی سماعت کو اے آر وائی نیوز کی درخواست پر مؤخر کر دیا گیا۔ صدر مملکت ممنون حسین کی جانب سے اے آروائی اور ڈان ٹی وی کے خلاف جھوٹی خبر نشر کرنے کی شکایت کی سماعت اے آروائی نیوز کے وکیل کی عدم موجودگی کی بنا پر اگلے اجلاس تک مؤخر کر دی گئی۔سردار اویس لغاری کی جانب سے سماء ٹی وی کیخلاف دائر کردہ شکایت کی سماعت کرتے ہوئے کونسل نے مذکورہ چینل کی جانب سے دائر کردہ جواب پر شکایت کنندہ کو اپنا مؤقف جمع کرانے کی ہدایت کی ہے ۔ جبکہ ریکٹر ،کامسیٹس انسٹیٹیوٹ آف انفارمیشن ٹیکنالوجی کی جانب سے آج ٹی وی کیخلاف دائر شکایت کی سماعت کرتے ہوئے کونسل نے شکایت کنندہ کو مخصوص شکایت درج کرانے کی ہدایت کی ہے۔ اجلاس میں دیگر کونسل ممبران محترمہ نزہت فاطمہ، پروفیسر ڈاکٹر مقصود جعفری، ڈاکٹر شا ہجہا ن سید، ہارون رشید اور محمد فاروق (آر جی ایم/سیکرٹری کونسل)نے شرکت کی۔