شکاگو(مانیٹرنگ ڈیسک) امریکہ کے شہر شکاگو میں ایک شخص سوشل میڈیا پر لائیو ویڈیو اسٹریمنگ کے دوران گولی لگنے سے ہلاک ہوگیا۔غیرملکی خبررساں ادارے کے مطابق 28 سالہ اینٹونیو پرکنز نے فیس بک لائیو ویڈیو اسٹریمنگ کے دوران نادانستہ طور پر اپنے ہی قتل کے لمحات کو محفوظ کرلیا۔رپورٹس کے مطابق اینٹونیو اپنے اسمارٹ فون کے ذریعے فیس بک پر سیلفی اسٹائل میں لائیو ویڈیو اسٹریمنگ میں مصروف تھا کہ اچانک اس دوران ایک درجن سے زائد گولیاں فائر ہوئیں۔رات ساڑھے 8 بجے کے قریب پیش آنے والے اس واقعے کی ویڈیو میں اس حوالے سے کچھ ریکارڈ نہ ہوسکا کہ فائرنگ کس نے کی۔گولی لگتے ہی پرکنز کے ہاتھ سے فون گر گیا، جس کے بعد صرف چیخ و پکار سنائی دی جانے لگی۔ایک خاتون کی آواز آئی، ‘او میرے خدا۔’اسی دوران ایک شخص نے کہا، ‘جلدی کرو! پولیس کو فون کرو۔ایک اور خاتون نے اینٹونیو کو مخاطب کرتے ہوئے کہ ٹونی تم ٹھیک ہو۔تاہم پولیس کے مطابق گردن اور سر میں گولی لگنے کے باعث اینٹونیو پرکنز کی موت واقع ہوگئی۔پولیس نے بتایا کہ ابھی تک کسی کو گرفتار نہیں کیا جاسکا، جبکہ واقعے کی تفتیش جاری ہے۔