بیجنگ (مانیٹرنگ ڈیسک ) چین کے تجویز کردہ بیلٹ اینڈ روڈ منصوبے کا پہلا ہائے وے پراجیکٹ پاکستان میں ایشین انفراسٹرکچر انویسٹمنٹ بینک ( اے آئی آئی بی ) اور ایشین ڈویلپمنٹ بینک ( اے ڈی بی )کے تعاون سے شروع کردیا گیا ہے جو کہ دونوں ممالک کے درمیان عملی تعاون کا پہلا منصوبہ ہو گا ،اس منصوبے میں اے ڈی بی ایک تیسری پارٹی کی شرکت سے تعاون کررہا ہے ، یہ منصوبہ یورپ اور ایشیاء کے درمیان قدیم تجارتی راستے پر مکمل کیا جارہا ہے جس نے اب خواب سے حقیقت کی طرف سفر کا آغاز کر دیا ہے ، اس منصوبے کا خیال سب سے پہلے چین کے صدر ژی جن پنگ نے پیش کیا تھا ،
یہ منصوبہ سلک روڈ اکنامک بیلٹ اور اکیسویں صدی کی میری ٹائم سلک روڈ کے منصوبے پر مشتمل ہے جو چین کے مشرقی ساحل کو مشرق وسطیٰ ، افریقہ اور مغربی یورپ سے منسلک کردیتا ہے ، یہ منصوبہ دنیا کے بیشتر ممالک کے مفاد ، خوشحالی اور ترقی کا ضامن ہے جو بتدریج ایک حقیقت بن کر ابھر آئے گا ۔ اے آئی آئی بی ،اے ڈی بی اور چین نے بیس ممالک کے ساتھ پیداواری استعداد میں تعاون کے معاہدوں پر دستخط کر دیئے ہیں جس سے سو ارب ڈالر کے فنڈ حاصل ہوں گے ، گذشتہ سال چینی کمپنیوں نے ان ممالک میں براہ راست سرمایہ کاری پر 15ارب ڈالر خرچ کئے ہیں ،ان منصوبوں کے راستے پر بنیادی ڈھانچے کے کئی منصوبے بھی مکمل کئے جائیں گے جن میں سے بعض پر کام جاری ہے جبکہ دیگر پر جلد کام کا آغاز کر دیا جائے گا جن میں ہنگری سربیا ریلوے اور جکارتہ بنڈون تیز رفتار ریل کا منصوبہ شامل ہے ۔