کراچی (این این آئی)اہل سنت والجماعت کے تحت ام المومنین سیدہ خدیجۃ الکبر یؓ کا یوم وفات ملک بھر میں انتہائی عقیدت وا حترام سے منایا گیا کراچی میں مرکز اہل سنت جامع مسجد صدیق اکبرؓ میں سیدہ خدیجہؓ کے یوم وفات کی مناسبت سے سیرت سیدہ خدیجہؓ سیمینار کا انعقاد کیا گیا جس میں شہر بھر سے اہل سنت والجماعت کے ذمہ داران و کارکنان سمیت بڑی تعداد میں عوام الناس نے شرکت کی، شرکاء سے خطاب کرتے ہوئے صدر اہل سنت والجماعت کراچی علامہ رب نواز حنفی ، علامہ تاج محمد حنفی ، سید محی الدین شاہ ، مولانا خالد محمود ، مولانا عادل عمر، قاری عبد الشکور، امیر فضل خالق ، محمد کامران اور دیگر کا کہنا تھا کہ سیدہ خدیجۃ الکبر یؓ عورتوں میں سب سے پہلے نبی مکرم ﷺ کی تصدیق کرنے والی عظیم خاتون تھیں ، سیدہ خدیجہؓ نے اپنا تمام مال دین اسلام کی ترویج و اشاعت کیلئے وقف کردیا تھا ، سیدہ خدیجہؓ کی حیات طیبہ عورتوں کیلئے مشعل راہ ہے ، وہ نبی مکرم ﷺ کی عظیم محسنہ ہیں جنہوں نے تن تنہا نبی ﷺ کا ساتھ دیا، یہ اعزاز سیدہ خدیجہؓ کے ساتھ ہی خاص ہے کہ وہ نبی رحمت ﷺ کی پہلی زوجہ منتخب ہوئی ان کا کہنا تھا کہ عورتیں اگر اپنے گھرانوں اور خاندانوں کو خوشحال دیکھنا چاہتی ہیں تو حضرت خدیجہؓ کی سیرت طیبہ پر عمل پیرا ہوجائیں گھر پر سکون اور خاندانوں کی ناچاقیاں ختم ہوجائیں گی ، مسلمان عورتیں اداکاراؤں اور گلوکاراؤں کو نہیں بلکہ امہات المومنین کو اپنا آئیڈیل بنائیں، پرنٹ اورالیکٹرانک میڈیا سیدہ خدیجہؓ سمیت تمام امہات المومنینؓ اور صحابیات رسولؓ کے فضائل ومناقت اور سیرت و کردار معاشرے تک پہنچانے میں اپنا کردار ادا کریں تو اس سے بڑی اور خوشگوار تبدیلی پیدا ہوگی ۔