اسلام آباد( آن لائن ) مسلم لیگ (ن) آزاد کشمیر میں ٹکٹوں کی تقسیم کے بعد شدید بغاوت کی لہر دوڑ گئی ،آزاد کشمیر کے 29حلقوں میں مضبوط امیدوار وں کی جانب سے بغاوت کے بعد مہاجرین کے حلقوں میں بھی لیگی ٹکٹ کے امیدواروں نے بغاوت کر دی ۔تفصیلات کے مطابق مسلم لیگ نے ٹکٹ کے امیداور معروف سیاسی و سماجی شخصیت سعد مجید بزمی نے آزاد کشمیر قانون ساز اسمبلی کے انتخابات میں حصہ لینے کیلئے حلقہ 40 ویلی 5 سے آزاد امیدوار کے طور پر کاغذات نامزدگی جمع کرا دئیے ہیں ،کاغذات جمع کرانے کے بعد میڈیا سے گفتگو کرتے ہوئے انہوں نے کہا کہ سیاست کو عبادت سمجھتا ہوں عوام نے خدمت کا موقع دیا تو عوام کی امیدوں پر پورا اتروں گا، حلقہ کی عوام کی بھرپور حمایت حاصل ہے پوری قوت سے الیکشن لڑوں گا انہوں نے کہا کہ آگر حلقہ کے عوام نے انہیں منتخب کیا تو وہ حلقہ کے تمام مسائل حل کرنے میں اپنا بھرپور کردار ادا کریں گے اور وہ حقیقی معنوں میں اپنے حلقے کی فلاح و بہبود کیلئے کام کریں گے ،سعد مجید بزمی کا مزید کہنا تھا کہ کہ ماضی میں اس حلقے سے منتخب ہونے والے امیدواروں نے اپنی عوام سے جھوٹے وعدے کیے اور اقتدار میں آکر انہوں نے اس حلقے کے مسائل کو حل کرنے میں کوئی دلچسپی نہیں لی۔ یاد رہے کہ اس سے قبل آزاد کشمیر کے 29حلقوں میں ٹکٹ نہ ملنے پر مضبوط امیدواروں نے بغاوت کر دی ہے اور آزاد امیدوار الیکشن لڑنے کا فیصلہ کیا ہے جبکہ اب مہاجرین کے حلقوں سے بھی پارٹی قیادت کے فیصلوں کو تسلیم نہ کرنے کی اطلاعات سامنے آ رہی ہیں ۔