اورلینڈو(مانیٹرنگ ڈیسک)اورلینڈو میں نائٹ کلب پر فائرنگ کے واقعے میں افغان نژاد مسلمان امریکی شہری کے ملوث ہونے کے بعد امریکا بھر میں مساجد کی سیکورٹی سخت کردی گئی ہے، مختلف امریکی شہروں میں نماز تراویح سخت سیکورٹی میں ادا کی گئی۔امریکی ٹی وی کے مطابق اورلینڈو نائٹ کلب فائرنگ واقعے کے بعد امریکا کے مسلمانوں کے لیے مشکلات بڑھنے کا خدشہ پیدا ہوگیا ہے۔ واقعے میں افغان نڑاد امریکی مسلمان شہری کے ملوث ہونے کی وجہ سے مسلمانوں پر ممکنہ حملوں کے پیش نظر پورے امریکا میں مساجد اور اسلامک سینٹرز کی سیکورٹی سخت کردی گئی ہے۔ مختلف مساجد و اسلامک سینٹرز میں سخت سیکیورٹی میں نماز تراویح ادا کی گئی ۔ ماضی میں دہشت گردی کے واقعات کے بعد مسلمانوں کے خلاف تشدد کے واقعات کے باعث امریکی حکومت نے سیکورٹی سخت کرنے کا فیصلہ کیا ہے۔