نیویارک (مانیٹرنگ ڈیسک) پاکستان نے کہا ہے کہ اقوام متحدہ کے امن آپریشن والے علاقوں میں تنازعات کے سیاسی حل کی ضرورت ہے۔ اقوام متحدہ میں پاکستان کی مستقل مندوب ڈاکٹر ملیحہ لودھی نے سلامتی کونسل میں امن آپریشن کے دوران شہریوں کے تحفظ کے موضوع پر ایک مذاکرے سے خطاب کرتے ہوئے کہا کہ امن اور استحکام کے قیام کیلئے اقوام متحدہ کے امن آپریشنز والے علاقوں میں تنازعات کے سیاسی حل پر زیادہ توجہ مرکوز کرنے کی ضرورت ہے۔ انہوں نے کہا کہ کوئی بھی آپریشن شروع کرنے سے قبل مسائل کے سیاسی حل کو مدنظر رکھا جائے کیونکہ صرف اسی صورت میں ہی پائیدار اور مستقل امن وسلامتی کو یقینی بنایا جاسکتا ہے۔ انہوں نے کہا کہ اگرچہ اس صورتحال میں شہریوں کی حفاظت کی بنیادی ذمہ داری میزبان ملک پر عائد ہوتی ہے تاہم تنازعات کو منظر عام پر لانے سے پہلے اس کے تدارک ، مسئلے کے اسباب پر غور اور اس کے حل کیلئے جامع سیاسی ذرائع کا استعمال وہ عوامل ہیں کہ جس سے شہریوں کی حفاظت کو موثر انداز میں یقینی بنایا جاسکتا ہے۔ انہوں نے پیس کیپنگ آپریشن میں خواتین کی شمولیت پر زور دیتے ہوئے کہا کہ اس سے بہتر نتائج آنے کی توقع ہے۔ ڈاکٹر ملیحہ لودھی نے کہا کہ پیس کیپنگ آپریشن میں شہریوں کی حفاظت کیلئے دیگر ذرائع کے علاوہ ایڈوکیسی ، ارتباط اور مقامی کمیونٹی سے روابط کا فروغ ضروری ہے۔ اس کے ساتھ ساتھ اس طرح کے آپریشنز کیلئے مناسب مالی وسائل کی فراہمی بھی ضروری ہے کیونکہ اس کے بغیر اہداف کا حصول ممکن نہیں ہوتا۔ انہوں نے عالمی ادارے کے امن مشن میں پاکستان کے کردار کو اجاگر کرتے ہوئے کہا کہ پاکستان کی افواج نے عوامی جمہوریہ کانگو، دارفور ، آئیوری کوسٹ ، وسطی افریقی جمہوریہ اور لائبیریا میں قیام امن کیلئے اپنا بھرپور کردارادا کیا۔