نیویارک (این این آئی)سابق ہیوی ویٹ باکسنگ چمپئن محمد علی کا جسدخاکی امریکی ریاست کنیٹکی میں ان کے آبائی علاقے لوئی ول پہنچا دیا گیا ہے جہاں رواں ہفتے جمعے کو نماز جنازہ ادا کی جائے گی ۔اس سے پہلے خاندان کے ذرائع نے کہا کہ جمعہ کو ان کا بہت بڑا جنازہ منعقد کیا جائیگا تاکہ دنیا بھر کے لوگوں کو انھیں خداحافظ کہنے کا موقع مل سکے۔یاد رہے کہ کھیلوں کی دنیا کی شہر ہ آفاق شخصیت محمد علی ہفتے کو 74 برس کی عمر میں انتقال کر گئے تھے۔ان کے خاندان کے ذرائع نے کہا کہ ان کا انتقال نامعلوم قدرتی وجوہات سے ہونے والے سیپٹک شاک سے ہوا ٗ سیپٹک شاک میں مریض کا بلڈ پریشر کسی انفیکشن کے باعث خطرناک حد تک گر جاتا ہے۔لوئی ول ایئر پورٹ سے گاڑیوں کے ایک قافلے کی شکل میں محمد علی کے تابوت کو لوئی ول کے اسلامی سینٹر لایا گیا ۔لوئی ول اسلامی سینٹر میں منعقد ہونے والی دعائیہ تقریب میں مسلمان ٗمسیحی ٗیہودیوں سمیت مختلف مذاہب سے تعلق رکھنے والے افراد نے شرکت کی اور انھیں خراجِ تحسین پیش کیا۔محمد علی کے خاندان کے ترجمان باب گنیل نے کہا کہ وہ ساری دنیا کے شہری تھے اور ہم چاہتے ہیں کہ ہر شعبہ ہائے زندگی سے تعلق رکھنے والے افراد ان کے جنازے میں شرکت کر سکیں۔