کابل(آئی این پی )افغانستان کے صوبے ہلمند میں طالبان کے حملے میں امریکی صحافی ڈیوڈ گلکی اور افغان مترجم سمیت 4 افراد ہلاک ہوگئے ۔افغان میڈیا کے مطابقصوبہ ہلمند میں مرجہ کے مقام کے قریب طالبان کی جانب سے راکٹوں سے حملہ کیا گیا جس میں 4 افراد ہلاک ہوگئے۔ ہلاک ہونے والوں میں امریکی صحافی ڈیوڈ گلکی، اور ان کا افغان مترجم ذبیح اللہ تمنا، گاڑی کا ڈرائیور اور ایک فوجی شامل ہیں۔ امریکی فوٹو جرنلسٹ ڈیوڈ گلکی اور ان کے افغان مترجم ذبیح اللہ تمنا ہلمند صوبے کے شہر لشکر گاہ سے افغان فوج کے ہمراہ مرجہ جا رہے تھے جب ان کی گاڑی کو نشانہ بنایا گیا۔ طالبان کی جانب سے راکٹ حملے کے بعد گاڑی پر فائرنگ بھی کی گئی تھی۔ قافلے میں دو اور امریکی صحافی بھی موجود تھے تاہم وہ محفوظ رہے۔ ڈیوڈ گلکی نے 2007 میں عراق میں امریکی میرینز پر ویڈیو بنانے پر نینشل ایمی بھی حاصل کیا تھا۔ 2011 میں وائٹ ہاس فوٹوگرافرز ایسوسی ایشن نے ان کو بہترین فوٹوگرافر کے ایوارڈ سے بھی نوازا تھا۔