اسلام آباد (این این آئی)فاقی وزیر خزانہ سینیٹر محمد اسحاق ڈار نے کہا ہے کہ یوتھ بزنس لون سکیم کے تحت حاصل کئے گئے قرضہ جات پر شرح سود کو 8 فیصد سے 6 فیصد تک کم کردیا گیا ہے۔ قومی اسمبلی میں خطاب کرتے ہوئے انہوں نے کہا کہ حکومت نے حال ہی میں شروع کی گئی یوتھ بزنس لون سکیم میں خواتین کیلئے 50 فیصد کا کوٹہ رکھا ہے تاکہ خواتین بھی آسان شرائط پر کاروباری سرگرمیوں کیلئے قرضے کی سہولت حاصل کرسکیں۔ وزیر خزانہ نے کہا کہ یوتھ بزنس لون سکیم کے تحت حاصل کئے گئے قرضہ جات پر شرح سود کو 8 فیصد سے 6 فیصد تک کم کردیا گیا ہے۔ انہوں نے کہا کہ حکومت نے وفاقی حکومت کی ملازمتوں میں عورتوں کیلئے سال 2007 ء سے 10 فیصد کوٹے کا اعلان کیا تھا جو اس سے پہلے پانچ فیصد تھا جبکہ خواتین عام نشستوں پر بھی اوپن میرٹ کے ذریعے ملازمت حاصل کرسکتی ہیں۔ صنعتی اصلاحات ایجنڈے کے تحت قومی اسمبلی میں خواتین کیلئے 60 نشستیں مختص ہیں۔ سینیٹر محمد اسحاق ڈار نے کہا کہ حکومت بے نظیر انکم سپورٹ پروگرام کے ذریعے خواتین کو نقد رقوم فراہم کرتی ہے اور اس کے حجم میں اضافہ کردیا گیا جو مالی سال 2013ء میں ماہانہ ایک ہزار روپے سے بڑھا کر 1200 روپے کیا گیا تھا اور اس کے بعد سال 2014ء میں اس کو 1500 روپے کردیا گیا۔ انہوں نے کہا کہ اس وقت وفاقی حکومت پروگرام کے تحت 50 لاکھ گھرانوں کو نقد رقوم کی منتقلی کررہی ہے۔ خواتین کو کام کے مقام پر ہراساں کرنے کے خلاف تحفظ ایکٹ کا حوالہ دیتے ہوئے انہوں نے کہا کہ یہ ایکٹ 2010ء میں منظور کیا گیا تھا جس کے تحت کام کے مقام پر عورتوں کو ہراساں کرنے کے خلاف تحفظ کیلئے 2013ء میں وفاقی محتسب کا قیام عمل میں لایا گیا ۔ انہوں نے کہا کہ کارکن خواتین کی سہولت کیلئے وفاقی حکومت ڈے کیئر خدمات کی رسائی میں بھی بہتری لا رہی ہے۔