لندن: عام طور پر نیند کی کمی کا شکار افراد سکون آور ادویات کا استعمال کرتے ہیں ۔تاہم حال ہی میں کی جانے والی ایک تحقیق کے مطابق کچھ پودے ایسے بھی ہوتے ہیں جن کی سونے کے کمرے میں موجودگی سے پرسکون نیند کا حصول ممکن ہوسکتا ہے ۔آج ہم آپکے ساتھ پرسکون نیند لانے والے 5پودوں کے خواص کے متعلق معلومات شیئر کریں گے ۔ پہلا پودا، چمیلی یا جیسمین:اس پودے پر لگنے والے پھولوں کی خوشبوبے حد مسحورکن ہوتی ہے جس کی وجہ سے دماغ اور جسم کو سکون ملتا ہے۔اس کی وجہ سے نہ صرف آپ پرسکون نیند پاسکیں گے بلکہ آپ کا ذہنی تناﺅاور بے چینی بھی کم ہوگی۔دوسرا پودا،نیاز بو یا لیونڈر:عام طور پر نیاز بو یا لیونڈر کے پودے کو گھروں میں خوشبو کے لئے اگایا جاتاہے اور اس کا آئل بھی ہمارے جسم کے لئے بہت مفید ہے جس کی وجہ اس میں موجود ایسے اجزاءہیں جو جسم کو تقویت دیتے ہیں۔اس کی خوشبو کی وجہ سے ہمارے جسم اور دماغ کو بہت سکون ملتا ہے جس کی وجہ سے رات کو سوتے میں اچھی نیند آتی ہے۔تیسراپودا،سنیک پلانٹ یا سانپ بوٹی:دیکھنے میں اس کے پتے سانپ کی طرح کے ہوتے ہیں لیکن حقیقت میں یہ ہمارے گھر کی فضاکو آلودگی سے پاک کرتا ہے۔اس کے ہرے اور پیلے پتے دیکھنے میں بہت خوبصورت لگتے ہیں اور اس کی ایک خاص بات اسے زندہ رکھنے کے لئے بہت زیادہ کوشش بھی نہیں کرنی پڑتی یہ صرف پانی دینے سے یہ خود بخود ٹھیک رہتا ہے۔دوسرے پودوں کے برعکس یہ پودا رات میں آکسیجن خارج کرتا ہے جس کی وجہ سے آپ کے کمرے میں آکسیجن کا لیول برقرار رہتا ہے اور پرسکون نیند بھی آتی ہے۔چوتھا پودا،انگلش آئی وی پلانٹ: یہ ایک ایسی بیل ہے جس کے پتے ہروقت سرسبز رہتے ہیں جس کی وجہ سے جہاں بھی اسے رکھا جاتا وہاں کی آب وہوا تازہ اور آلودگی سے پاک رہتی ہے۔اسے اگانا بھی آسان ہے اور اس کی دیکھ بھال بھی زیادہ مشکل نہیں ہے۔اسے کمرے میں رکھنے سے آکسیجن کا لیول برقرار رہنے کے ساتھ ہوا بھی صاف رہتی ہے جس کی وجہ سے رات کو پرسکون نیند آتی ہے۔اگرآپ کے گھر میں بچے ہیں تو پھر یہ پودا استعمال نہ کریں کیونکہ اگر انسان اسے کھا لے تو یہ اس کے لئے زہر کا کام کرتا ہے۔پانچواں پودا،کوار گندل یا ایلوویرا:یہ پودا جہاں ہماری جلد کے لئے بہت مفید ہے وہیں اس کی وجہ سے رات کے وقت بھی کمرے میں آکسیجن مہیا ہوتی رہتی ہے اور آپ پرسکون نیند حاصل کرسکتے ہیں۔