اسلام آباد (نیوزڈیسک)گوگل نے خاموشی سے سماجی رابطوں کی ویب سائٹس کا ایک مقبول ترین فیچر اپنی موبائل ایپ پر ٹیسٹ کرنا شروع کردیا۔ایک ویب سائٹ میش ایبل کی رپورٹ کے مطابق فیس بک اور ٹوئٹر کے ٹرینڈنگ ٹاپکس کی طرح گوگل نے بھی اپنی سرچ بار میں سرچ ٹرینڈنگ ٹاپکس کا فیچر متعارف کرایا ہے۔یہ فیچر گوگل سرچ بار میں ایک لفظ ٹائپ کرنے کے بعد کام شروع کردیتا ہے اور صارف کے سامنے ڈراپ ڈاﺅن مینیو میں مقبول ترین ٹرینڈنگ سرچز کی فہرست آجاتی ہے۔اس میں سے کسی کا انتخاب کرنے پر صارف کے سامنے اس حوالے سے مضامین کا مجموعہ آجاتا ہے۔یہ فیچر ابھی محدود تعداد میں لوگوں کو دستیاب ہوا ہے اور وہ بھی کم وقت کے لیے، جس کے بعد یہ غائب ہوجاتا ہے۔گوگل نے اس حوالے سے بات کرنے سے انکار کیا ہے، مگر یہ بالکل ممکن ہے کہ سوشل میڈیا سائٹس میں اس کی مقبولیت دیکھتے ہوئے اسے آزما کر دیکھا جارہا ہو۔گوگل کی جانب سے اس فیچر کو اپنانا حیران کن بھی نہیں کیونکہ فیس بک یا ٹوئٹر کی جانب سے صارفین کو اپنی ایپس میں مصروف رکھنے کے لیے نت نئے طریقے آزمائے جاتے ہیں۔اسی طرح گوگل بھی اپنی بہترین سرچز کو ہائی لائٹ کرنا چاہتا ہے تاکہ لوگ زیادہ دیر تک اس کے سرچ انجن پر موجود رہیں۔