برسلزایئرپورٹ پر خودکش حملہ آوروں کی شناخت ہوگئی
برسلز(نیوزڈیسک)بلجیم میڈیا نے دعویٰ کیا ہے کہ برسلز ایئرپورٹ پر خودکش حملہ آوروں کی شناخت ہوگئی جو پیرس حملوں میں بھی ملوث تھے۔بلجیم کے مقامی میڈیا نے پولیس ذرائع کے حوالے سے دعویٰ کیا ہے کہ بلجیم ائیرپورٹ پر ہونے والے 2 دھماکوں میں ملوث خودکش بمباروں کی شناخت خالد اور ابراہیم البکروی کے نام سے ہوئی ہے جنہیں ویڈیو میں ایئرپورٹ پر مشکوک انداز میں دیکھا جاسکتا ہے۔مقامی میڈیا نے دعویٰ کیا ہے کہ دونوں خودکش بمباروں کا تعلق پیرس حملوں کے ماسٹر مائنڈ صالح عبدالسلام سے بھی تھا اور دونوں نے چند روز قبل ہی برسلز میں کرائے کا مکان حاصل کیا جب کہ پولیس نے ان کے گھر پر چھاپے کے دوران اس مکان سے صالح عبدالسلام کے فنگر پرنٹس بھی حاصل کرلئے ہیں۔واضح رہے کہ گزشتہ روز بلجیم کے دارالحکومت برسلز میں ایئرپورٹ، میٹرواسٹیشن اور شاہی محل کے قریب 7 بم دھماکوں میں 34 افراد ہلاک اور 200 سے زائد زخمی ہوگئے تھے۔