کراچی (نیوز ڈیسک)رواں مالی سال 9ماہ کے دوران بجلی گھروں میں استعمال ہونےوالا ایندھن 50فیصد سستا ہونے سے عوام کے لیے فی یونٹ بجلی کے نرخوں میں بتدریج کمی واقع ہو رہی ہے ۔انڈسٹری ماہرین کے مطابق رواں مالی سال کے آغاز پر فی ٹن فرنس ائل کے دام 50 ہزار روپے کے قریب تھے جو اب لگ بھگ 25 ہزار کے قریب آچکے ہیں ۔ بجلی گھروں میں استعمال ہونے والے اس ایندھن کے دام گرنے سے پاور پلانٹس کی پیداواری لاگت بھی گھٹی ہے ۔ماہرین کا کہنا ہے کہ اگر عالمی سطح پر خام تیل کی قیمتوں میں اضافہ ہوا تو بجلی گھروں کی پیداواری لاگت بھی بڑھے گی ، اس لیے حکومت کو ہوا اور شمسی اور توانائی سے بجلی کے حصول کے منصوبوں پر تیزی سے کام کرنا چاہیئے تاکہ عوام کو متواتر سستی بجلی فراہم ہو سکے ۔