اسلام آباد (نیوز ڈیسک) آزاد کشمیر، خیبر پختونخوا اور کرم ایجنسی میں طوفانی بارشوں سے تباہی جاری ہے، لینڈ سلائیڈنگ اور چھتیں گرنے سے بچوں اور خواتین سمیت 23 افراد جان کی بازی ہار گئے، آزاد کشمیر میں سینکڑوں مکانات تباہ ہو گئے، متعدد علاقوں کا زمینی رابطہ کٹ گیا۔تفصیلات کے مطابق آزاد کشمیر اور خیبر پختونخوا میں آسمان سے مسلسل برسنے والا پانی قہر بن گیا، مظفر آباد کے نواحی علاقے سرلی سچہ میں موسلا دھار بارش سے پہاڑی تودہ ایک گھر پر آ گرا، میاں، بیوی سمیت ایک ہی خاندان کے 5 افراد دب کر جاں بحق ہو گئے، ایک بچی معجزانہ طور پر محفوظ رہی، جسے پاک فوج کی امدادی ٹیم نے ملبے سے زندہ نکال لیا ہے۔راولا کوٹ کے چغاڑ گاؤں میں چھت گرنے سے دو خواتین دم توڑ گئیں، باغ میں لینڈ سلائیڈنگ سے میاں بیوی جاں بحق اور ان کی چار بیٹیاں زخمی ہو گئیں۔ ایل او سی پر واقع ضلع حویلی میں گرنے والے مکان نے دو خواتین کی جان لے لی جبکہ عباسپور کے بٹول گاؤں میں ماں بیٹی بھی اپنے مکان کی چھت تلے آ کر زندگی کی بازی ہار گئیں۔آزاد کشمیر میں لینڈ سلائیڈنگ سے سیکڑوں مکانات تباہ، جبکہ مواصلات کا نظام درہم برہم ہو گیا۔ شاہراہ نیلم سمیت کئی سڑکیں بند ہو گئیں، باغ کا اسلام آباد سے رابطہ کٹ گیا۔ کرم ایجنسی کے علاقے گوندال میں طوفانی بارش کے باعث مکان کی چھت گر گئی، میاں بیوی اور ان کے چار بچے جان کی بازی ہار گئے۔لوئر دیر تیمر گرہ کے قریب میاں بانڈا میں چھت گرنے سے ایک ہی خاندان کے پانچ افراد اجاں بحق اور دو زخمی ہو گئے۔ خیبر ایجنسی کے علاقے سادھو خیل میں بارش سے دیوار گر گئی، 4 بچے زخمی ہو گئے۔