اسلام آباد (نیوزڈیسک)ترکی نے پشاور بم دھماکے کی شدید الفاظ میں مذمت کرتے ہوئے کہا ہے کہ ترکی دہشت گردی کے خلاف جنگ میں پاکستان کے ساتھ مکمل تعاون جاری رکھے گا۔ جمعہ کو اسلام آباد میں ترکی کے سفارت خانے سے جاری بیان میں کہا گیا کہ ترکی 16 مارچ کو پشاور میں سرکاری ملازمین کی بس پر دہشت گرد حملے کی پرزور مذمت کرتا ہے انہوں نے بم دھماکہ میں جاں بحق افراد کے لواحقین، حکومت اور پاکستانی عوام کے ساتھ دلی تعزیت کا اظہار کیا اور زخمیوں کی جلد صحت یابی کی دعا کی۔ ترکی نے اس عزم کا اعادہ کیا کہ پاکستان دہشت گردی کے خلاف اس جنگ میں کامیاب ہوگا اور ترکی اس سلسلے میں برادر ملک پاکستان کے ساتھ تعاون جاری رکھے گا۔ واضح رہے کہ پشاور میں سرکاری ملازمین کی بم حملے کے نتیجے میں 17افراد جاں بحق اورمتعدد زخمی ہوگئے تھے ۔