اسلام آباد (نیوزڈیسک) حکومت پاکستان نے یوم پاکستان کو شایان شان طریقے سے منانے کا فیصلہ کرلیا ہے اس ضمن میں پاکستان نیشنل کونسل آف دی آرٹس ،وزارتِ اطلاعات، نشریات اور قومی ورثہ نے یومِ پاکستان کو شایانِ شان طریقہ سے منانے اور نوجوان نسل کو بزرگوں کی قربانیوں سے آگاہ کرنے اور پاکستانی ثقافتی ورثہ سے روشناس کرانے کے لیے خصوصی پروگرام ترتیب دئیے ہیں پروگراموں میں عوامی جمہوریہ چین کے فنکاروں پر مشتمل خصوصی ثقافتی طائفہ بھی شرکت کرے گا جو 23مارچ کو دن 3 بجے پی این سی اے آڈیٹوریم میں پاکستانی و چینی موسیقی اور رقص پیش کریں گے۔ 23 مارچ کو شام 7 بجے اسی آڈیٹوریم میں پاکستان کے نامور گلوکار سائرہ نسیم، فضل جٹ، ندیم عباس لونے والا اپنے فن کا مظاہرہ کریں گے اس کے علاوہ نیشنل پرفارمنگ آرٹس گروپ کے ڈانسرز علاقائی رقص پیش کریں گے۔ جمعرات 24 مارچ کو دن 4:00 بجے پی این سی اے کا قومی پتلی گھر تحریک پاکستان کی کہانی پتلیوں کے زبانی پیش کریگا۔ صحت ، تعلیم اور ماحولیات پر خاکے بھی پروگرام کا حصہ ہے۔ اسی روز شام 7:00 بجے خواجہ معین الدین کا شہرہ آفاق کھیل تعلیمِ بالغاں پیش کیا جائے گا جس میں معروف فنکار قوی خان، قاضی واجد ، باطن فاروقی، طاہر صدیقی، امتیاز علی کاشف اور غیاث مستانہ قومی ترقی کے لیے اتحاد تنظیم اور یقین محکم کی ضرورت کو نوجوانوں کے سامنے لانے کی کوشش کریں گے۔