اسلام آباد(نیوز ڈیسک) اسلام آباد کی سیشن عدالت نے عبدالرشید غازی قتل کیس کے ملزم پرویز مشرف کو بیرون ملک جانے سے روکنے اور گرفتار کرکے عدالت میں پیش کرنے کی درخواست پر وزارت داخلہ اور آئی جی اسلام آباد کو نوٹس جاری کرتے ہوئے 2 اپریل تک رپورٹ طلب کر لی۔ جمعرات کو ایڈیشنل سیشن جج پرویز قادر میمن نے عبدالرشید غازی قتل کیس میں مدعی کی جانب سے دائر متفرق درخواست پر سماعت کی جس میں موقف اختیار کیا گیا تھا کہ پرویز مشرف کا نام ای سی ایل سے خارج ہونے پر بیرون ملک فرار کا خدشہ ہے۔درخواست میں موقف اختیار کیا گیا کہ عدالت ملزم کے ناقابل ضمانت وارنٹ گرفتاری جاری کر چکی ہے لہٰذا عدالتی حکم کی نقول ملک کے تمام ایئرپورٹس پر بھجوائی جائیں، بیرون ملک روانگی کی کوشش پر ملزم کو گرفتار کر کے عدالت کے سامنے پیش کرنے کے احکامات جاری کیے جائیں۔