لاہور(نیوزڈیسک) جمعیت علمائے اسلام (ف) کے سربراہ مولانا فضل الرحمن نے کہا ہے کہ تحفظ حقوق نسواں قانون وزیر اعظم کےلئے بھی سر پرائز تھا، وزیر اعلیٰ نے قانون پر سخت موقف اپنانے پر گلوے شکوے بھی کئے ۔ یہ باتیں مولانا فضل الرحمن نے منصورہ میں مذہبی جماعتوں اور علماءکرام کے اجلاس میں بتائیں ۔ انہوں نے ایک روز قبل وزیر اعظم اور وزیر اعلیٰ سے ہونے والی ملاقات کے بارے میں بتایا کہ وزیر اعظم نواز شریف نے قانون سازی سے پہلے ہمیں اعتماد میں نہ لینے پر وزیر اعلی پنجاب سے شکوہ کیا۔ مولانا فضل الرحمن نے انکشاف کیا کہ وزیر اعظم کیلئے بھی تحفظ حقوق نسواں قانون سرپرائز تھا۔ انہوں نے شرکاءکو بتایا کہ قانون پر سخت موقف اپنانے پر وزیر اعلیٰ شہباز شریف نے گلوے شکوے بھی کئے۔ وزیر اعظم کو قانون کے بارے میں علم نہ ہونے کے حوالے سے مولانا فضل الرحمن کے انکشاف پر کانفرنس کے شرکا ءنے بھی حیرانی کا اظہار کیا ۔