لاہور( نیوزڈیسک)پاکستان پیپلز پارٹی کے چیئرمین بلاول بھٹو زرداری سابق گورنر پنجاب سلمان تاثیر کے بازیاب ہونے والے صاحبزادے شہباز تاثیر سے ملاقات اور اہل خانہ کو مبارکباد دینے اچانک کراچی سے لاہور پہنچ گئے ، بلاول بھٹو کی اچانک لاہور آمد کاپارٹی رہنماﺅں کی اکثریت کوعلم نہ ہو سکا جس کے باعث وہ استقبال کےلئے ائیر پورٹ نہ پہنچ سکے ۔ تفصیلات کے مطابق پاکستان پیپلز پارٹی کے سربراہ بلاول بھٹو زرداری خصوصی طیارے کے ذریعے اولڈ ائیر پورٹ پہنچے جہاں سے انہیں انتہائی سخت سکیورٹی میں سابق گورنر پنجاب سلمان تاثیر کی کیولری گراﺅنڈ میں واقعہ رہائشگاہ پر لایا گیا ۔ بلاول بھٹو نے ساڑھے چار سال بعد بازیاب ہونے کے بعد گھر پہنچنے والے شہباز تاثیر اور ان کے اہل خانہ سے ملاقات کر کے انہیں مبارکباد دی ۔ بلاول بھٹو زرداری کافی دیر تک شہباز تاثیر کے ہمراہ رہے اور ان سے اس واقعے بارے حقائق سے بھی آگاہی حاصل کی ۔ بلاول بھٹو نے اپنے والد آصف علی زرداری کی طرف سے بھی شہباز تاثیر اور ان کے اہل خانہ کو مبارکباد کا خصوصی پیغام پہنچایا ۔بلاول بھٹو کے میڈیا ایڈوائزر جمیل سومرو نے بتایا کہ پارٹی چیئرمین نجی دورے پر لاہور آئے جبکہ انکے دورہ جنوبی پنجاب کے حوالے سے یوسف رضا گیلانی اورمخدوم احمد محمود اعلان کرچکے ہیں۔ انہوں نے کہا کہ بلاول بھٹو نے شہباز تاثیر اور ان کے اہل خانہ سے ملاقات کر کے انہیں مبارکباد دی ہے اور واقعہ کے بارے میں حقائق سے بھی آگاہی حاصل کی ۔ انہوں نے وفاقی وزیر داخلہ چوہدری نثار کی طرف سے شہباز تاثیر کی بازیابی میں مس لیڈ کرنے بارے سوال کے جواب میں کہا کہ حکومت کو حقائق کا پتہ ہونا چاہیے اور حکومت اس کا کھوج لگائے کہ کیوں اسے مس لیڈ کیا گیا اور اس کے حقائق عوام کے سامنے آنے چاہئیں۔ انہوںنے کہا کہ پیپلز پارٹی میں خوشیاںکم کم ہی ملتی ہیں اس لئے شہباز تاثیر کی بازیابی کے بعد پوری پارٹی خوش ہے اور جشن منا رہے ہیں ۔انہوں نے کہا کہ دعا ہے کہ یوسف رضا گیلانی کے صاحبزادے بھی جلد بازیاب ہوجائیں۔