لاہور(نیوزڈیسک) قومی اسمبلی میں حزب اختلاف کے لیڈر اور پاکستان پیپلز پارٹی کے سینئر رہنما سید خورشید شاہ نے کہا ہے کہ وفاقی حکومت نیب بارے بوکھلا گئی ہے نیب پر تنقید کرنے سے لگتا ہے کہ کوئی گڑبڑ ہے۔ ان خیالات کا اظہار انہوں نے اپنے دورہ لاہور میں میڈیا سے بات چیت کرتے ہوئے اورخواتین کے عالمی دن کے حوالے سے پاکستان پیپلز پارٹی شعبہ خواتین پنجاب کے زیر اہتمام منعقدہ ایک تقریب سے خطاب کرتے ہوئے کیا۔ اپوزیشن لیڈر نے کہا کہ نیب کے پنجاب میں آنے پر حکومت نیب سے خوفزدہ ہے۔ انہوں نے کہا کہ نیب کو چھوٹے صوبوں کے خلاف کارروائی کے لیے حکومت نے کہا تھا لیکن حکومت چاہیے کہ وہ نیب کو کام کرنے دیا جانا چاہیے۔ سید خورشید شاہ نے کہا کہ پاکستان مسلم لیگ (ن) چھوٹی بڑی کرپشن کرتی رہتی ہے جبکہ پنجاب بڑی کرپشن کرتا ہے ۔ پنجاب میں جاری اور مکمل کیے جانے والے منصوبوں میں کرپشن ہوتی ہے۔ انہوں نے کہا کہ لاہور میں زیر تکمیل اورنج لائن ٹرین منصوبہ 200ارب روپے کا ہے جبکہ حکومت کو 400ارب روپے کی تقسیم کے بارے میں بتائے ۔ انہوں نے کہا کہ اپوزیشن پارلیمنٹ میں ڈیل سے متعلق نہ ہٹانے پر چیخ چیخ کر تھک گئی ہے لیکن حکومت کے کان پر جوں تک نہیں رینگتی۔ انہوں نے کہا کہ حکومت جو 200ارب روپے کا منصوبہ شروع کررہی ہے یہ منصوبہ حکومت کو مہنگا پڑے گا جو حکومت کے گلے پڑ جائے گا۔ انہوں نے کہا کہ حکومت صوبہ پنجاب کا بڑا حصہ لاہور میں خرچ کررہی ہے۔ایل این جی کی ڈیل گزشتہ اڑھائی سال سے چل رہی ہے۔