نیویارک (نیوز ڈیسک) کیا آپ نے کبھی غور کیا ہے کہ اکثر لوگوں کی غذا یکساں ہوتی ہے، کام بھی ایک جیسا اور جسمانی سرگرمیاں بھی لگ بھگ ملتی جلتی مگر پھر بھی ان میں سے کچھ موٹاپے کے شکار اور کچھ فٹ ہوتے ہیں ؟اگر ہاں تو اس کا جواب ایک چیز میں چھپا ہے جس پر عمل نہ کرنا آپ کو موٹاپے کا شکار کرسکتا ہے۔
امریکا میں ہونے والی ایک طبی تحقیق میں بتایا گیا ہے کہ جسمانی طور پر متحرک رہنے کے باوجود اگر نیند پوری نہ کی جائے تو انسان موٹاپے کا شکار ہوسکتا ہے۔محققین کا کہنا ہے کہ کم نیند جسمانی وزن میں اضافے، جسمانی چوٹوں کا خطرہ بڑھانے اور جسمانی ہارمونز کی سطح میں کمی کا باعث بنتا ہے جس سے ڈپریشن اور ہڈیوں کی کمزوری کا امکان بھی ہوتا ہے۔
ماہرین کے مطابق گہری نیند کے دوران جسمانی مسلز اپنی کمزوریوں پر قابو پاتے ہیں، ٹشوز کی مرمت ہوتی ہے اور دماغ یاداشت کو تشکیل دینے کے ساتھ ساتھ زہریلے مواد کو نکال باہر کرتا ہے۔اس پراسیس کے بغیر آپ کی ورزش اور خوراک کا خیال رکھنا کسی کام کا نہیں ہوتا۔
انہوں نے مزید کہا کہ بیشتر افراد سوچتے ہیں کہ وہ جم جاکر مسلز بنارہے ہیں مگر یہ کام نیند کے دوران ہوتا ہے اور ٹوٹ جانے والے ٹشوز کی مرمت سے مسلز مضبوط ہوتے ہیں۔
خیال رہے کہ اچھی نیند کے دیگر متعدد فوائد بھی ہیں جیسے ملازمت میں آپ کی کارکردگی کو بہتر بنانا، زندگی کی معیاد بڑھانے میں مدد دینا، دوسروں میں زیادہ مقبول بنانا وغیرہ۔