لاہور(نیوز ڈیسک)لاہور ہائیکورٹ نے سرگودھا ائیر بیس پر ممکنہ حملے کے الزام میں گرفتار افغانی ملزم کی سزاکے خلاف دائر اپیل مسترد کر دی۔لاہور ہائیکورٹ کے دو رکنی بنچ کے رو برو ملزم حکم خان کے وکیل نے موقف اختیار کیا کہ پولیس نے ہینڈ گرینیڈ رکھنے اور سرگودھا ائیر بیس پر حملے کے الزام میںاسے کسی قانونی جواز ،ٹھوس شواہد کے بغیر پکڑ کر مقدمہ درج کیااور انسداد دہشت گردی سرگودھا عدالت نے بھی قانونی تقاضے پورے کئے بغیرملزم حکم خان کو پانچ سال قید کی سزا کا حکم سنا رکھا ہے لہٰذاعدالت سزاکو کالعدم قرار دے۔ڈپٹی پراسیکیوٹر جنرل پنجاب خرم خان نے عدالت کو آگاہ کیا کہ ملزم کو ہینڈ گرنیڈ سمیت اس وقت موقع پر گرفتار کیا گیا جب وہ سرگودھا ائیر بیس پر حملے کے لئے منصوبہ بندی کے ساتھ آگے بڑھ رہا تھا۔انہوں نے کہا کہ عدالت نے ملزم کو قوانین کے تحت پانچ سال قید کی سزا کا حکم سنایا لہذا ملزم کی اپیل مسترد کی جائے۔