کوٹلی (نیوز ڈیسک) پاکستان تحریک ان صاف کے چئیرمین عمران خان نے کہا ہے کہ اقوام متحدہ کی قراردادوں کے مطابق مسئلہ کشمیر حل کیا جائے ۔ ہم کشمیریوں کے حقوق کے لئے آواز بلند کرتے رہیں گے۔ کشمیر یوں کو اپنی مرضی و منشاءکے مطابق اپنے مستقبل کا فیصلہ کرنے کا حق ہے انہیں یہ حق انٹرنیشنل کمیونٹی نے دیا ہے۔ اسلئے کشمیر یوں کو یہ حق دیا جائے۔آزاد کشمیر کے آئندہ انتخابات میں میں خود انتخابی مہم چلاﺅں گا۔ میں بیرسٹر سلطان محمود چوہدری کو کوٹلی میں کامیاب جلسے پر مبارکباد دیتا ہوں اور یقین دلاتا ہوں کہ آزاد کشمیر کا آئندہ الیکشن تو آپ جیت ہی چکے ہیں۔ آپ صرف دھاندلی روکنے کا بندوبست کریں۔انتخابات میں جیت انشا ءاللہ پی ٹی آئی کی ہوگی۔ان خیالات کا اظہار انھوں نے آج یہاں کوٹلی میں کشمیر پی ٹی آئی کے زیر اہتمام آزاد کشمیر میں بڑے جلسہ عام سے خطاب کرتے ہوئے کیا۔آزاد کشمیر کے سابق وزیر اعظم و کشمیر پی ٹی آئی کے صدر بیرسٹر سلطان محمود چوہدری نے کہا ہے کہ پاکستان تحریک انصاف کے چئیرمین عمران خان نے ایک ایسے وقت میں آزاد کشمیر میںتبدیلی کا نعرہ لگایا ہے جب مودی نواز شریف سازشیں کررہے تھے۔ جس طرح عمران خان نے بدل دو کشمیر کا نعرہ لگایا ہے اور اب آزاد کشمیر کے فیصلے آزاد کشمیر میں ہونگے۔ آزاد کشمیر کے عوام اب باہر نکل آئے ہیں اور پی ٹی آئی کے پلیٹ فارم پر جمع ہو رہے ہیں اور آج کوٹلی کے اس تاریخ ساز جلسے میں اتنی بڑی تعداد میں لوگوں نے شریک ہو کر فیصلہ دے دیا ہے کہ کشمیر پی ٹی آئی آزاد کشمیر کی سب سے بڑی عوامی و سیاسی جماعت ہے۔ اس موقع پر خطاب کرتے ہوئے جہانگیر ترین نے کہا کہ جسطرح عمران خان نے بدل دو کشمیر کا نعرہ لگایا ہے اور اب کشمیر کے فیصلے کشمیر میں ہونگے۔ہم مقبوضہ کشمیر کی آزادی کے لئے آواز بلند کرتے رہیں گے۔ اس موقع پر کشمیر پی ٹی آئی کے چیف آرگنائزر چوہدری ظفر انور، کشمیر پی ٹی آئی کے مرکزی سیکریٹری اطلاعات سردار امتیاز خان، مرکزی ترجمان عطاءمحی الدین قادری، فیصل جاوید اور دیگر نے بھی خطاب کیا۔ اس موقع پر ممبر کشمیر کونسل چوہدری محبوب نے پیپلز پارٹی سے مستعفی ہو کر عمران خان اور بیرسٹر سلطان محمود چوہدری کی قیادت پر اپنے اعتماد کا اظہار کرتے ہوئے کشمیر پی ٹی آئی میں شمولیت کا اعلان کیا۔عمران خان نے مزید کہا کہ کشمیری عوام کو انکا حق خود ارادیت دیا جائے ا ور اقوام متحدہ کی قراردادوں کے مطابق مسئلہ کشمیر حل کیا جائے۔تاکہ مسئلہ کشمیر کشمیری عوام کی خواہشات کے مطابق حل ہو۔انھوں نے کہا کہ میں آزاد کشمیر کے انتخابات میں پی ٹی آئی کے امیدواروں کی انتخابی مہم خود چلاﺅں گا۔ آزاد کشمیر کے انتخابات میں کسی کو دھاندلی کی اجازت نہیں دی جائے گی۔