لاہور…… وزیر اعظم نواز شریف نے کہا ہے کہ آخری دہشت گرد کے خاتمے تک آرام سے نہیں بیٹھیں گے، شکار پور کے واقعے نے پوری قوم کو سوگوار کر دیا ہے، ضرب عضب کے ذریعے دہشت گردوں کے خلاف کارروائی کر رہے ہیں۔

ان کا کہنا تھا کہ جنرل راحیل شریف کے ہمراہ جلد کراچی اور کوئٹہ جاؤں گے، جنرل راحیل شریف کے ساتھ سیاسی وعسکری قیادت سے ملاقاتیں ہوں گی۔

وزیر اعظم ایلیٹ پولیس ٹریننگ اسکول میں انسداد دہشت گردی فورس کی پہلی پاسنگ آؤٹ تقریب منقعد ہوئی، انسداد دہشت گردی فورس کے پہلے بیج میں 16خواتین سمیت 421 اہلکاروں نے تربیت حاصل کی۔

وزیر اعظم نے مزید کہا کہ نیشنل ایکشن پلان کے تحت دہشت گردی کے ناسور کو جڑ سے اکھاڑا جا رہا ہے، دہشت گردی کے خلاف جنگ ہماری پوری قوم کی جنگ ہے۔

انسداد دہشت گردی فورس کے حوالے سے انہوں نے کہا کہ فورس کے ہاتھوں کوئی مجرم نہیں بچنا چاہیے، آرمی چیف کا ممنون ہوں کہ انہوں نے انسداددہشت گردی فورس کی تربیت میں دلچسپی لی، دہشت گردی کےخلاف جنگ میں پوری قوم مسلح افواج کے ساتھ ہے۔

نواز شریف نے بتایا کہ انسداد دہشت گردی فورس کو جدید ہتھیاروں اور آلات سےلیس کیا جائے گا، فورس سے شہریوں کو احساس تحفظ ملنا چاہیے، دہشت گردی آئندہ نسلوں کی بقاء کا مسئلہ ہے، دہشت گردی کے خلاف جنگ ہر حال میں جیتنی ہے۔

دیگر مسائل کی طرف اشارہ کرتے ہوئے وزیر اعظم نے کہا کہ پاکستان کو دہشت گردی کے ساتھ ساتھ توانائی کا بحران بھی درپیش ہے، جب قوم متحد ہو تو کسی چیلنج سے نمٹنا مشکل نہیں۔

قبل ازیں وزیراعلیٰ پنجاب شہبازشریف نے خطاب میں کہا کہ عسکری اور سیاسی قیادت مل کر دیر پا امن کے قیام کو ممکن بنائے گی، دہشت گردوں کو پیغام دیا ہے کہ ان کے خاتمےکا وقت آگیا ہے۔

شہباز شریف نے کہا کہ پاکستان کو اس کا اصل مقام دلائیں گے، فورس کے جوان ملک کو حقیقی معنوں میں امن کا گوارہ بنائیں گے،انسداد دہشت گردی فورس ملک کو امن کا گہورہ بنائے گی۔