اسلام آباد (نیوز ڈیسک)صدر مملکت ممنون حسین نے ملک بھر سے تعلق رکھنے والے ضرورتمند 43 آرٹسٹوں ، ادیبوں اور فن کاروں کےلئے ایک کروڑ 17 لاکھ روپے کی امداد کی منظوری دےدی۔صدر مملکت نے امداد کی منظوری فیڈرل گورنمنٹ ویلفیئر آرٹسٹ فنڈ کی سٹیرنگ کمیٹی کے اجلاس میں دی جو ایوان صدر میں منعقد ہوا۔اجلاس میں سیکرٹری کابینہ ڈویژن راجہ حسن عباس، وفاقی سیکرٹری اطلاعات و نشریات صبا محسن رضا، چیئرمین پاکستان ٹیلی ویڑن کارپوریشن عطاءالحق قاسمی و دیگر اعلیٰ حکام نے شرکت کی۔صدر مملکت نے اجلاس سے خطاب کرتے ہوئے کہا کہ ادیب ، شاعر اور فنکار معاشرے کا قابل قدر حصہ ہیں جو تہذیب اور اقدار کی آبیاری کرتے ہیں۔ ضرورت کے وقت معاشرے کو ان کے کام آنا چاہئے۔ انہوں نے کہا کہ وفاقی حکومت کے آرٹسٹ ویلفیئر فنڈمیں اضافہ کیا جائےگا تاکہ زیادہ سے زیادہ فنکاروں کی مدد کی جاسکے۔اجلاس میں ویلفیئر فنڈ میں اضافے کےلئے بعض تجاویز پر بھی غور کیا گیا۔ اس موقع پر ممتاز صنعت کار اور اسٹیرنگ کمیٹی کے رکن عارف حبیب نے فنڈ کےلئے پچاس لاکھ روپے کے عطیہ کا اعلان بھی کیا۔ اجلاس میں زیبا محمد علی، اصغر ندیم سید، پروفیسر ڈاکٹر اکرم دوست، شاہد شفیق، محمد قوی خان، سلمان علوی، عارف حبیب، مصطفی قریشی، نجیب اللہ انجم اور دیگر اعلیٰ حکام نے شرکت کی۔