اسلام آباد( نیوز ڈیسک)وزیر اعظم محمد نواز شریف نے میرٹ اور شفافیت کو یقینی بنانے کیلئے پاکستانی سفارتخانوں ، عالمی اور علاقائی تنظیموں میں غیر ملکی تعیناتی کے حوالے سے رہنماء اصول وضع کرنے کی ہدایت کر دی ،تحریری امتحان کا انتظام متعلقہ وزارت لاہور یونیورسٹی آف مینجمنٹ سائنس یا انسٹی ٹیوٹ آف بزنس ایڈمنسٹریشن کراچی کے ذریعے کریگی۔ ۔وزیر اعظم کے سیکرٹری کی جانب سے جاری ایک مکتوب کے مطابق ان ہدایات کی روشنی میں پاکستانی سفارتخانوں اور بین الاقوامی ، کثیرالجہتی و علاقائی تنظیموں میں تعیناتیوں کے دوران پالیسی پر عملدرآمد کو یقینی بنایا جائیگا۔ پالیسی گائیڈ لائنز کے تخت متعلقہ وزارت یا ڈویژن اس بات کو یقینی بنائے گا کہ انتخاب کا عمل مکمل طور پر شفاف اور میرٹ کی بنیاد پر کیا گیا ہے ۔ رہنماء اصولو کے تحت غیر ملکی عہدے پر تعیناتی کی مدت پر سختی سے عملدرآمد کیا جائیگا اور اس میں توسیع نہیں ہوگی، کسی بھی گروپ کے افسر کو اپنی پوری ملازمت کے دوران دو مرتبہ بیرون ملک تعینات کیا جائیگا اور وہ دو تعیناتیوں کے دوران مجموعی طور پر چھ سال تک خدمات سرانجام دے سکے گا۔ وزیر اعظم کی منظوری کے بغیر ان پالیسی گائیڈ لائنز میں کوئی نرمی نہیں کی جائیگی۔ نئے افسران کے انتخاب کے عمل کو مکمل کرنا متعلقہ سیکرٹری کی ذاتی ذمہ داری ہوگی۔مستقبل میں بیرون ملک تعیناتی کیلئے عہدہ اور قابلیت، عمر اور تجربے سمیت دیگر مختلف شرائط پر عملدرآمد کو یقینی بنایا جائیگا۔ امیدوار کو اہلیت ثابت کرنے کیلئے پیشگی تحریری امتحان پاس کرنا ہوگا۔ تحریری امتحان کا انتظام متعلقہ وزارت لاہور یونیورسٹی آف مینجمنٹ سائنس یا انسٹی ٹیوٹ آف بزنس ایڈمنسٹریشن کراچی کے ذریعے کریگی۔ تحریری امتحان میں کم سے کم اہلیت کا سکور 60فیصد مقرر کیا گیا ہے ۔تحریری امتحان میں کامیاب امیدواروں کو انٹرویو کیلئے بلایا جائیگا اور کامیاب امیدواروں کے انٹرویو ایک کمیٹی کریگی جسے وزیر اعظم کی منظوری سے تشکیل دیا جائیگا۔ تحریری امتحان کے 80فیصد اور انٹرویو کے 20فیصد نمبر ہونگے۔ انٹرویو کیلئے کم سے کم پاسنگ مارکس مقرر نہیں ہونگے۔ کامیاب امیدواروں کو میرٹ ، تحریری اور انٹرویو میں سکور کی بنیاد پر تعینات کیلئے اپنی پسند کے سٹیشن کا آپشن بھی دیا جائیگا۔