پشاور(نیوزڈیسک)خیبرپختونخواحکومت اور محکمہ صحت کے ہڑتالی ملازمین کے درمیان مذاکرات کامیاب ہوگئے، ملازمین نے ہڑتال ختم کرنے کا اعلان کردیا۔خیبرپختونخوا کے وزیراعلیٰ پرویز خٹک کی زیر صدارت ہسپتالوں کے ہڑتالی ملازمین اور محکمہ صحت کے حکام کے درمیان ہونے والے مذاکرات کامیاب ہو گئے اور ملازمین نے تین دنوں سے جاری ہڑتال ختم کرنے کا اعلان کردیا۔ مذاکرات میں اس بات پر اتفاق کیا گیا کہ صحت کے شعبے میں موجودہ صوبائی حکومت کے اصلاحاتی اقدامات پر کوئی سمجھوتہ نہیں کیا جائے گا جبکہ ڈاکٹروں اور دیگر طبی عملے کے مطالبات پر غور کرنے کیلئے آنے والے پیر کے دن صوبائی وزیر صحت کی زیر صدارت محکمہ صحت کے اعلیٰ حکام اور ملازمین کا ایک اجلاس منعقد کیا جائے گا جس میں اُن کے مطالبات سے متعلق تفصیلات طے کی جائیں گی۔مذاکرات میں اس بات پر اتفاق کیا گیا کہ ان ملازمین کو ہیلتھ پروفیشنل الاﺅنس دینے کیلئے صوبائی حکومت اپنے دستیاب وسائل کے اندر رہتے ہوئے محکمہ خزانہ سے مشاورت کے بعد اقدامات اُٹھائے گی اس موقع پر ہڑتالی ملازمین کو جاری کئے گئے شو کاز نوٹسز کے معاملے پر حکومت نے نرم رویہ برتنے کا عندیہ دے دیا۔