نئی دہلی (نیوز ڈیسک) سیاچن کے مسئلے پر پاکستان اور بھارت دونوں ممالک کے درمیان جلد از جلد مذاکرات ہونے چاہئیں ،قیمتی جانوں کے نقصان کو روکا جائے۔ ان خیالات کا اظہار بھارت میں تعینات پاکستانی ہائی کمشنر عبدالباسط نے بھارتی میڈیا سے بات چیت کرتے ہوئے کیا۔ انہوں نے کہا کہ مجھے قوی امید ہے کہ اس مسئلے پر دونوں ممالک کے درمیان جلد بات ہوگی ،سیاچن میں پاکستان اور بھارت کے فوجی تعینات ہیں اور آئے دن سردی کی شدت اور برفانی تودے گرنے سے وہاں ہلاکتوں کے واقعات رونما ہوتے رہتے ہیں ۔ انہوں نے سیاچن سانحے میں بھارتی فوجیوں کی ہلاکتوں پر دلی افسوس کا اظہار کیا۔ پاکستانی ہائی کمشنر کا کہنا تھا کہ سیاچن مسئلے پر مزید قیمتی جانوں کے نقصان کو روکا جائے۔ انہوں نے کہا کہ وزیر اعظم نواز شریف نے اقوام متحدہ میں بھی سیاچن مسئلے کو زیر بحث لایا تھا، دونوں ممالک کے درمیان جلد از جلد مذاکرات ہونے چاہئیں اور مجھے قوی امید ہے کہ سیاچن کے مسئلے پر دونوں ممالک کے درمیان جلد بات ہوگی۔