لاہور(نیوز ڈیسک ) ڈائریکٹر جنرل جنگلی حیات و پارکس پنجاب خالد ایاز خان نے کہا ہے کہ ابوظہبی میں بریڈ کئے جانے والے 220تلوروں کو لال سہانرا پارک کے ہوبارا چنکارہ انکلوژر میں آزاد کرنے کے انتظامات مکمل کر لئے گئے ہیں۔انہوں نے یہ بات یہاں اپنے دفتر میں ہوبارا فاؤنڈیشن انٹرنیشنل کے عہدیداروں سے ملاقات کے بعد تلوروں کو آزاد کرنے کے انتظامات بارے اجلاس سے خطاب کرتے ہوئے کہی۔ اس موقع پر محکمہ جنگلی حیات کے تمام سینئر افسران بھی موجود تھے۔ انہوں نے بتایاکہ آزاد کئے جانے تلور ابوظہبی اور متحدہ عرب امارات میں قائم انٹرنیشنل فنڈ فار ہوبارا کنزرویشن کی طرف سے عطیہ کئے جا رہے ہیں۔انہوں نے کہا کہ محکمہ جنگلی حیات پنجاب اور ہوبارا فاؤنڈیشن کے درمیان تلوروں کو لائے جانے کے حوالے سے درآمدی و برآمدی پرمٹوں اور عدم اعتراض کے سرٹیفکیٹس کا تبادلہ کیاجا چکا ہے۔ انہوں نے کہاکہ آزاد کئے جانے والے تلور پاکستان کی رہائشی نسل کے ہیں اور توقع ہے کہ وہ پنجاب کے قدرتی اور آزاد ماحول میں سکونت اختیار کرکے اپنی نسل کی بڑھوتری اور تعداد میں اضافہ کرسکیں گے جس سے اس جنگلی حیات کی آبادی کو معمول پر رکھنے میں بڑی مدد ملے گی۔خالد ایاز خان نے بتایاکہ ہوبارا انٹرنیشنل فاؤنڈیشن کے عہدیدار مجاہد المنصوری آزاد کئے جانے والے تلوروں کے ہمراہ 14فروری کی رات 2بجے پاکستان پہنچیں گے اور 15فروری کو صبح 9 بجے ان تلوروں کو آزاد کر دیا جائے گا۔ انہوں نے کہاکہ لال سہانرا پارک کے ہوبارہ چنکارہ انکلوژر میں تلور آزاد کرنے کی باقاعدہ تقریب کا انعقاد کیا جائے گا جس میں محکمہ جنگلی حیات کے اعلیٰ افسران اور ہوبارہ انٹرنیشنل فاؤنڈیشن کے عہدیدار شرکت کریں گے۔انہوں نے کہاکہ پنجاب میں آزاد کئے جانے والے تلوروں کو انفرادی طور پر شناختی چھلے (رنگ) پہنائے گئے ہیں جبکہ منتخب تلوروں کی حرکات و سکنات اور نسل کشی کی صلاحیت کو مانیٹر کرنے کیلئے سیٹلائٹ ٹرانسمیٹر بھی نگائے گئے ہیں تاکہ ان تلوروں کو آزاد کرنے کے بعد ہفتے میں دو بار ان کا ڈیٹا اکٹھا کیا جاسکے۔